British Airways aviakompaniyasi Londondagi shtab-kvartirasini sotib yuborish imkoniyatlarini o‘rganib chiqmoqda. Bunga kompaniya xodimlarining ko‘p qismi masofadan ishlashga o‘tgani sabab bo‘lmoqda, endi aviatashuvchiga ofisning katta qismi kerakmas bo‘lib qoldi. Bu haqda Bloomberg xodimlar ishlari bo‘yicha direktor Styuart Kennedining so‘zlariga asoslangan holda xabar tarqatgan.
Ofis sotuvi pandemiya tufayli jiddiy zarar ko‘rgan kompaniyaning moliyaviy ahvolini yaxshilashi mumkin. Waterside binosi 1998-yilda qurilgan va taxminan 200 million funt sterlingga baholangan. Ayni vaqtda aviakompaniya binoning taxminiy narxini aniqlash maqsadida ko‘chmas mulk sohasidagi tegishli mutaxassislarni yollagan.
Kennedining aytishicha, British Airways masofadan turib ishlovchilar hamda ofisdan bevosita xizmat ko‘rsatuvchilarning mazkur masala yuzasidan fikr-mulohazalarini o‘rganmoqchi.
Aviakompaniya pandemiya davrida qiyinchiliklarni yengib o‘tish uchun eski samolyotlarini ekspluatatsiyadan olgan, shuningdek, minglab ishchi o‘rinlarini qisqartirgandi. British Airways vakili kompaniyaning biznes yo‘nalishlarini o‘zgartirgani va inqirozdan chiqishga intilayotganini, shuningdek, bunday katta ofis binosidan foydalanish zaruriyatining qanchalik maqsadga muvofiqligini ham tahlil etadi.
Mavzuga doir:
Eslatib o‘tamiz, dunyo aviakompaniyalari 2020-yilda koronavirus pandemiyasi tufayli 370 milliard dollar yo‘qotgan.
Izoh (0)