Irlandiya sog‘liqni saqlash vazirligi koronavirus infeksiyasini chaqiruvchi SARS-CoV-2 virusining mutatsiyalashuvi ehtimolini istisno qilish uchun qorako‘zan (norka)larni yo‘q qilib tashlashni tavsiya etdi, deb yozadi “RBK”.

Foto: EPA

Vazirlik xabarida aytilishicha, testdan o‘tkazish chog‘ida qorako‘zanlarning COVID-19’ga chalinishi bilan bog‘liq birorta ham holat aniqlanmagan, ammo pandemiya sharoitida bu hayvonlarni boqish “doimiy ravishda xavf tug‘diradi”.

Irlandiyada jami uchta qorako‘zan fermasi bo‘lib, ular Liish, Kerri va Donegol grafliklarida joylashgan. RTE radiostansiyasi ma’lumotlariga qaraganda, jonivorlarni yo‘q qilish haqidagi qaror ijrosini yaqin orada amalga oshirish rejalari yo‘q, ammo fermalar egalariga sog‘liqni Saqlash vazirligi tegishli ogohlantirish bergan.

Fermerlar fikricha, hukumat “hech qanday ilmiy yoki yuridik asoslarni taqdim etmagan holda” sog‘lom jonivorlarni yo‘q qilmoqchi, bu qaror esa hayvonotchilik xo‘jaliklari egalarini yashash uchun mablag‘siz qoldiradi. “Irlandiya hukumati Daniyada yaqinda qabul qilingan, fermalardagi barcha hayvonlarni yo‘q qilish haqidagi qarorga tayanmoqda, lekin bu qaror fermalarda kasallanganlar soni tezlik bilan o‘sishiga asoslanganini ular nazardan chetda qoldirmoqda”, — dedi ular.

Irlandiya hukumati dasturiga allaqachon mamlakatda qorako‘zanlar yetishtirishni bosqichma-bosqich to‘xtatish haqidagi band kiritilgan. Biroq qabul qilingan buyurtmalarni bajarishlari uchun fermerlarga o‘ldirilgan jonivorlardan mo‘ynalarni shilib olishga ruxsat berilishi mumkin, deyiladi radiostansiya xabarida.

4-noyabr kuni Daniya hukumati hayvonlarda koronavirus infeksiyasini keltirib chiqaradigan SARS-CoV-2 virusi mutatsiyasiga uchraganidan keyin mamlakatdagi barcha fermer xo‘jaliklarida qorako‘zanlar yo‘q qilinishini ma’lum qildi. Ushbu virus shtammlari organizmning koronavirusga qarshi antitanani ishlab chiqarish qobiliyatini pasaytiradi, bu esa kelajakdagi vaksinalar samaradorligini nazariy jihatdan pasaytirishi mumkin.

10-noyabr kuni Daniya hukumati fermerlardan kasal va sog‘lom holatdagi barcha qorako‘zanlarni o‘ldirishni talab qilish uchun qonuniy asosga ega emasligini tan oldi. Hukumat faqat kasallangan fermalarda qorako‘zanlarni o‘ldirishni talab qilishi mumkinligini aytdi. O‘sha kuni Daniya hukumati mamlakatdagi qorako‘zanlarni yo‘q qilish to‘g‘risidagi qarorini qo‘llab-quvvatlovchi qonun loyihasini parlamentga taqdim etdi.

Daniyadagi fermalarda koronavirus bilan kasallangan barcha qorako‘zanlar yo‘q qilinishi ortidan mamlakat oziq-ovqat, qishloq xo‘jaligi va baliq xo‘jaligi vaziri Mogens Yensen o‘z lavozimini tark etishini e’lon qildi. Avvalroq, u ba’zi fermer xo‘jaliklarida hayvonlarda koronavirus mutatsiyasi aniqlanganligi sababli mamlakatda yetishtirilgan qorako‘zanlarni yo‘q qilish to‘g‘risidagi qaror noto‘g‘ri bo‘lganligini tan olgandi.

Jahon sog‘liqni saqlash tashkiloti (JSST) ma’lum qilishicha, Daniyadan tashqari, Ispaniya, Italiya, AQSh, Niderlandiya va Shvetsiyada ham qorako‘zanlar koronavirus bilan kasallangani aniqlangan.