Shavkat Mirziyoyev Nurafshon shahrida amalga oshirilayotgan loyihalar bilan tanishdi

Shavkat Mirziyoyev Nurafshon shahrida amalga oshirilayotgan bunyodkorlik loyihalari bilan tanishdi. Bu haqda Prezident matbuot xizmati xabar qildi.

Ma’lum qilinishicha, 2017-yil Toshkent viloyati markazi Nurafshon shahriga ko‘chirilgan, davlat rahbari 2019-yili bu yerga kelganida zamonaviy majmualar barpo etish bo‘yicha ko‘rsatmalar bergan edi.

Bu galgi tashrif chog‘ida bajarilgan ishlar ko‘zdan kechirildi. Davlat rahbariga Nurafshon shahrining bosh rejasiga muvofiq amalga oshirilayotgan ishlar to‘g‘risida ma’lumot berildi.

Bugungi kunda Toshkent yo‘li kengaytirilib, uning ikki tomonida 42 obyekt foydalanishga topshirilgan. Ayni paytda bunyodkorlik ishlari davom etmoqda. Ilgarigi bir qavatli eski imoratlar o‘rnida 7 va 9 qavatli uylar, ma’muriy binolar, biznes markazlar, mehmonxona, tibbiyot va ta’lim muassasalari, gipermarketlar qurilmoqda.

Toshkent viloyatida madaniyat, ta’lim, sog‘liqni saqlash sohalarini rivojlantirish chora-tadbirlari yuzasidan taqdimot o‘tkazildi.

Prezident maktab va bog‘chalarni qurish bilan birga, ta’lim mazmunini boyitish, endi qamrovdan sifatga o‘tish kerakligini ta’kidladi. Aholi kelishiga qulay joyda zamonaviy shifoxona tashkil etib hamda uni klinik baza qilib, malakali mutaxassislar tayyorlash bo‘yicha topshiriq berdi.

Bundan avval Shavkat Mirziyoyev Chirchiq shahar “to‘rtligi”ni nega ishdan olmaganini aytgani, Toshkent viloyati ikkiga bo‘linishi mumkinligini ma’lum qilgani hamda Prezident tavsiyasiga ko‘ra, Davron Hidoyatov Toshkent viloyati hokimi lavozimiga tasdiqlangani haqida xabar berilgandi.