Namangan shahrining Davlatobod tumanida “Yangi O‘zbekiston— yoshlar ziyo maskani” kutubxonasining ochilish marosimi bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
Yangi kutubxonaning umumiy maydoni 5220 kvadrat metrni tashkil etadi. Bino 3 ta qavat, arxiv va fond saqlash uchun mo‘ljallangan yerto‘ladan iborat. Bu yerda bir vaqtning o‘zida 1200 kishiga xizmat ko‘rsatish mumkin.
“Kutubxona 30 mingdan ortiq badiiy va ilmiy adabiyotlar, o‘quv qo‘llanmalari bilan ta’minlandi. Kelgusi 3 yilda kitoblar sonini 100 mingtaga olib chiqish rejalashtirilgan”, — deydi kutubxona direktori Dilnoza Azizova.
Binoning birinchi qavatida bolalar maydonchasi tashkil etilgan bo‘lib, bu yerda ular uchun mo‘ljallangan jihozlar, o‘yinchoqlar va kitoblar mavjud.
Ochilish marosimida viloyat hokimi Shavkatjon Abdurazzoqov tomonidan yangi ziyo maskaniga 1000 ta ilmiy va badiiy kitob sovg‘a sifatida topshirildi.
Eslatib o‘tamiz, qurish va jihozlashda innovatsion yondashuvlar tatbiq qilingan ushbu kutubxona oldinroq ijtimoiy tarmoqlarda keng muhokama va e’tiroflarga sabab bo‘lgandi.
Izoh (0)