Bosh prokuratura xodimining Oliy sud xodimlari bilan til biriktirib, fuqarolarning murojaatlarini biznesga aylantirgani va boshqa holatlar haqida xabar tarqaldi. Bosh prokuratura mazkur xabar yuzasidan bayonot berdi.
Aniqlanishicha, xabar D.X. tomonidan tarqatilgan. Avvalroq D.X.ning o‘ziga nisbatan bo‘lgan ma’muriy ish bo‘yicha chiqarilgan sud qarorlaridan norozi bo‘lib yo‘llagan murojaatlari Bosh prokuraturada ko‘rib chiqilgan. Ish hujjatlariga asosan, D.X. 2018-yil 12-oktabr Nexia’ni haydab ketayotib, boshqaruvni yo‘qotgan. Natijada yo‘lning qarama-qarshi tarafiga o‘tib ketib, J.S. boshqaruvidagi Nexia bilan to‘qnashuv sodir etgan. D.X.ning orqasidan harakatlanib kelayotgan Matiz haydovchisi S.R. uning Nexia’si orqa qismiga urilgan.
Holat yuzasidan Urganch tuman ma’muriy sudining 2019-yil 11-oktabrdagi qarori bilan D.X. Ma’muriy javobgarlik to‘g‘risidagi kodeksning 133-moddasi (transport vositalari haydovchilarining yo‘l harakati qoidalarini buzishi jabrlanuvchiga yengil tan jarohati yoki ancha miqdorda moddiy zarar yetkazilishiga olib kelishi), S.R. mazkur kodeksning 134-moddasi (haydovchilarning yo‘l harakati qoidalarini buzishi transport vositalarining yoki boshqa mol-mulkning shikastlanishiga olib kelishi) va 135-moddasi (yo‘l harakati qoidalarida nazarda tutilgan hujjatlari bo‘lmagan shaxslarning transport vositalarini boshqarishi) 2-qismi bilan aybdor deb topilib, ularga nisbatan eng kam ish haqining 3 baravari miqdorida, ya’ni 552 ming so‘mdan jarima tayinlangan.
Shu bilan birga, ushbu qarorda D.X.dan J.S.ning foydasiga avtotransport vositasiga yetkazilgan zarar uchun 1 million 778 ming so‘m, S.R.dan D.X.ning foydasiga 264 ming so‘m moddiy zarar undirish ko‘rsatilgan. Xorazm viloyat ma’muriy sudi kassatsiya instansiyasining 2020-yil 16-yanvardagi qarori bilan birinchi instansiya sudi qarori o‘zgartirilib, D.X.ga nisbatan tayinlangan jarima jazosi eng kam ish haqining 1 baravari miqdorida, ya’ni 184 300 so‘m etib belgilangan. Sudda D.X.ning sodir qilgan huquqbuzarligi ishda to‘plangan tushuntirish xatlari, yo‘l-transport hodisasi chizmasi, fotosuratlar hamda boshqa dalillar bilan o‘z tasdig‘ini topgan.
Xorazm viloyat prokuraturasi tomonidan huquqbuzar D.X.ning ayblilik masalasi dalillar bilan to‘liq tasdiqlanmagani asos qilinib, ishning unga oid qismini tugatish haqida Oliy sudga nazorat tartibida protest keltirish masalasini ko‘rib chiqish bo‘yicha Bosh prokuraturaga taqdimnoma kiritilgan. Biroq taqdimnomada keltirilgan vajlar ish hujjatlarida o‘z tasdig‘ini topmagani bois taqdimnoma quvvatlanmasdan qaytarilgan.
Bundan tashqari, Bosh prokuratura tomonidan uning murojaati asosida ushbu ma’muriy ish qayta o‘rganib chiqilib, Oliy sud ma’muriy ishlar bo‘yicha sudlov hay’atiga protest keltirish uchun asoslar aniqlanmagan.
Izoh (0)