Shimoliy Koreya hukumati Vashington Pxenyanga nisbatan dushmanlik siyosatidan voz kechmaguncha AQShning yangi ma’muriyati bilan aloqa o‘rnatmasligini aytdi. Bu haqda KXDR tashqi ishlar vazirining birinchi o‘rinbosari Chve Son Xining Koreya markaziy telegraf agentligi tomonidan e’lon qilingan bayonotiga tayanib “Interfaks” xabar berdi.
Avvalroq Oq uy fevral o‘rtalaridan buyon bir nechta diplomatik kanallar, shu jumladan, Nyu-Yorkdagi kanallar orqali Pxenyan bilan bog‘lanishga urinib kelgani, ammo Shimoliy Koreya rahbariyati bu urinishlarni e’tiborsiz qoldirganini aytgan edi.
“AQSh Janubiy Koreya bilan qo‘shma harbiy mashg‘ulotlar boshlashidan bir kun oldin bizga xabar yubordi, ular biz bilan ishonchli tarzda qayta aloqa o‘rnatishni so‘radi. Ammo biz AQShning o‘yinlariga munosabat bildirib o‘tirishga hojat yo‘q, deb o‘ylaymiz”, — deyiladi bayonotda.
KXDR tashqi ishlar vazirining o‘rinbosari agar AQSh Shimoliy Koreyaga qarshi dushmanlik siyosatidan voz kechmasa, koreys-amerika aloqalari va muzokaralarining olib borilishi mumkin emasligini ta’kidladi. “Shuning uchun biz Qo‘shma Shtatlarning aloqa o‘rnatishga qaratilgan bunday urinishlarini e’tiborsiz qoldirishda davom etamiz”, — dedi Chve Son Xi.
Uning ta’kidlashicha, Pxenyan va Vashington o‘rtasidagi muloqot “bir stolda teng huquqli o‘tirib, fikr almashish” muhitini talab qiladi.
Shimoliy Koreya tashqi ishlar vazirining o‘rinbosari qo‘shimcha qilishicha, Pxenyan “AQShning sevimli sanksiyalariga” javob qaytarishga tayyor.
“Biz allaqachon ‘jangga jang’ va ‘yaxshilikka yaxshilik’ tamoyillari bo‘yicha AQShga qarshi turamiz, deb qaror qilganmiz”, — deya xulosa qildi Chve Son Xi.
Mavzuga doir: Shimoliy Koreya AQSh bilan munosabatlari “umidsizlik nuqtasi”ga yetganini ma’lum qildi
Izoh (0)