Tailand bosh vaziri Prayut Chan-Ocha AstraZeneca vaksinasining birinchi dozasini qabul qildi. U mamlakatda xavfsizlik nuqtayi nazaridan preparatni qo‘llash to‘xtatilganidan keyin ushbu dori bilan emlangan birinchi odam bo‘ldi, deb yozadi “Korrespondent.net”.
“Men ushbu harakatim bilan keng jamoatchilikning ishonchini oshiraman”, — dedi bosh vazir vaksina qabul qilishdan oldin. Vazirlar Mahkamasi rahbaridan tashqari, hukumatning yana bir nechta a’zolariga vaksina yuborildi.
Prayut va boshqa vazirlar vaksinani o‘tgan hafta qabul qilishi kerak edi, ammo Yevropaning ushbu preparatning qon tromblari ko‘rinishidagi nojo‘ya ta’sirlari haqidagi xabarlaridan so‘ng Tailand AstraZeneca vaksinasidan foydalanishni vaqtinchalik to‘xtatdi.
Tailandda 15-mart, dushanba kuni koronavirusga qarshi AstraZeneca vaksinasi bilan emlash kampaniyasi davom etishi ma’lum qilindi.
AstraZeneca vaksinasining salbiy reaksiyaga ega emasligi tasdiqlangan. Hozirda emlash hukumat a’zolari va ko‘p sonli kishilar bilan yaqin muloqotda bo‘ladigan mansabdor shaxslardan boshlanadi”, — dedi Prayut Chan-Ocha.
Qayd etish joizki, Tailandning o‘zida ishlab chiqariladigan AstraZeneca vaksinasining 60 milliondan ortiq dozasi allaqachon mamlakat fuqarolari uchun saqlab qo‘yilgan.
Eslatib o‘tamiz, AstraZeneca bilan emlanganlarning qonida tromblar paydo bo‘lishi bilan bog‘liq bir nechta holatlar haqidagi ma’lumotlardan keyin bir qator mamlakatlar preparatdan foydalanishni to‘xtatib qo‘ydi. Xususan, Germaniya, Fransiya, Italiya, Ispaniya, Sloveniya, Portugaliya, Kipr, Niderlandiya, Avstriya, Daniya, Estoniya, Latviya, Litva, Bolgariya, Irlandiya, Lyuksemburg, Norvegiya va Islandiya, shuningdek, Yevropadan tashqaridagi Indoneziya, Kongo, Tailand va Janubiy Afrika mamlakatlarida mazkur vaksinadan foydalanish to‘xtatilgan.
Jahon sog‘liqni saqlash tashkiloti (JSST) esa AstraZeneca vaksinasidan foydalanishni to‘xtatishga sabab ko‘rmayotganini ma’lum qilgan. Bundan tashqari AstraZeneca kompaniyasining vakili vaksinaning yuzaga kelishi mumkin bo‘lgan nojo‘ya ta’sirlari sababli mamlakatlarda undan foydalanish taqiqlangani haqida xabarlarga munosabat bildirgan.
Izoh (0)