Таиланд бош вазири Прают Чан-Оча AstraZeneca вакцинасининг биринчи дозасини қабул қилди. У мамлакатда хавфсизлик нуқтаи назаридан препаратни қўллаш тўхтатилганидан кейин ушбу дори билан эмланган биринчи одам бўлди, деб ёзади «Korrespondent.net».
«Мен ушбу ҳаракатим билан кенг жамоатчиликнинг ишончини ошираман», — деди бош вазир вакцина қабул қилишдан олдин. Вазирлар Маҳкамаси раҳбаридан ташқари, ҳукуматнинг яна бир нечта аъзоларига вакцина юборилди.
Прают ва бошқа вазирлар вакцинани ўтган ҳафта қабул қилиши керак эди, аммо Европанинг ушбу препаратнинг қон тромблари кўринишидаги ножўя таъсирлари ҳақидаги хабарларидан сўнг Таиланд AstraZeneca вакцинасидан фойдаланишни вақтинчалик тўхтатди.
Таиландда 15 март, душанба куни коронавирусга қарши AstraZeneca вакцинаси билан эмлаш кампанияси давом этиши маълум қилинди.
AstraZeneca вакцинасининг салбий реакцияга эга эмаслиги тасдиқланган. Ҳозирда эмлаш ҳукумат аъзолари ва кўп сонли кишилар билан яқин мулоқотда бўладиган мансабдор шахслардан бошланади», — деди Прают Чан-Оча.
Қайд этиш жоизки, Таиланднинг ўзида ишлаб чиқариладиган AstraZeneca вакцинасининг 60 миллиондан ортиқ дозаси аллақачон мамлакат фуқаролари учун сақлаб қўйилган.
Эслатиб ўтамиз, AstraZeneca билан эмланганларнинг қонида тромблар пайдо бўлиши билан боғлиқ бир нечта ҳолатлар ҳақидаги маълумотлардан кейин бир қатор мамлакатлар препаратдан фойдаланишни тўхтатиб қўйди. Хусусан, Германия, Франция, Италия, Испания, Словения, Португалия, Кипр, Нидерландия, Австрия, Дания, Эстония, Латвия, Литва, Болгария, Ирландия, Люксембург, Норвегия ва Исландия, шунингдек, Европадан ташқаридаги Индонезия, Конго, Таиланд ва Жанубий Африка мамлакатларида мазкур вакцинадан фойдаланиш тўхтатилган.
Жаҳон соғлиқни сақлаш ташкилоти (ЖССТ) эса AstraZeneca вакцинасидан фойдаланишни тўхтатишга сабаб кўрмаётганини маълум қилган. Бундан ташқари AstraZeneca компаниясининг вакили вакцинанинг юзага келиши мумкин бўлган ножўя таъсирлари сабабли мамлакатларда ундан фойдаланиш тақиқлангани ҳақида хабарларга муносабат билдирган.
Изоҳ (0)