“Bu biz uchun ham yangilik bo‘ldi” — Zoir Mirzayev Yakkabog‘ tumanida ko‘mir zaxirasi topilganini ma’lum qildi

Qashqadaryo viloyati hokimi Zoir Mirzayev 15-mart, dushanba kuni OAV vakillariga bergan intervyusida 2020-yili Yakkabog‘ tumanida yangi ko‘mir koni topilganini ta’kidladi, deya xabar bermoqda “Daryo” muxbiri.

“O‘tgan yili viloyatning Yakkabog‘ tumanidagi ikkita hududda 5,4 million tonnalik ko‘mir zaxirasi topildi. Bu biz uchun ham yangilik bo‘ldi. Ko‘mir zaxirasini birinchi marta auksionga qo‘ydik. Uni ikkita tadbirkor — biri 4 milliard so‘mga, ikkinchisi esa 2,9 milliard so‘mga sotib oldi. Bu ishbilarmonlar endi investitsiya kiritadi. Ilgari bu kabi konlar to‘g‘ridan to‘g‘ri berib yuborilardi, auksion o‘tkazilmasdi”, — dedi Mirzayev.

Avvalroq Prezident Shavkat Mirziyoyev Qashqadaryo viloyatida amalga oshiriladigan investitsiya loyihalari taqdimoti bilan tanishgani haqida xabar berilgan edi.