Toshkentning Olmazor tumanida joylashgan shifoxonada qo‘riqchini kaltaklagan ikki kishiga jinoiy ish qo‘zg‘atildi. Bu haqda IIV Tergov departamenti xabar berdi.
Ma’lum qilinishicha, voqea 14-mart kuni soat 16:08 larda yuz bergan. 45 yoshli B.U. va 51 yoshli R.Q. Akfa Medline shifoxonasining o‘z xizmat vazifasini bajarayotgan qo‘riqchisi 27 yoshli A.A.ni haqorat qilib, urib, tan jarohati yetkazgan.
Holat yuzasidan Olmazor tumani bo‘yicha IIO FMB huzuridagi Tergov bo‘linmasi tomonidan B.U. va R.Q.ga nisbatan Jinoyat kodeksining 277-moddasi (bezorilik) 3-qismi “g” bandi bilan jinoyat ishi qo‘zg‘atilib, protsessual tartibda ushlangan.
Olib borilgan tergov harakatlari davomida aniqlanishicha, B.U. mazkur shifoxonada davolanayotgan bo‘lgan. R.Q. uni ko‘rishga kelib, shifoxona ichki tartib qoidalariga ko‘ra mumkin bo‘lmasa-da, bemor xonasiga kirishni talab qilgan va qarshilik ko‘rsatib, bemor xonasiga kirgan. Bir soatdan so‘ng B.U. va R.Q. tashqariga chiqib, qo‘riqchiga “qo‘lingdan nima keldi?” deb mazax qilgani tufayli ushbu janjal kelib chiqqan.
Tergov departamenti bu turdagi jinoyatlar uchun Jinoyat kodeksida 3 yildan 5 yilgacha ozodlikni cheklash yoxud 3 yildan 5 yilgacha ozodlikdan mahrum qilish jazosi belgilanganini eslatib o‘tgan.
Avvalroq Jizzaxda chaqiruv bo‘yicha yetib kelgan shifokor xonadon egasining o‘g‘li tomonidan kaltaklangani, Samarqandda shifoxona qorovuli va shifokorini urgan shaxsga nisbatan jinoyat ishi qo‘zg‘atilgani, Farg‘onada tez yordam xodimlarini kaltaklagan shaxs qamoqqa olingani, Sirdaryoda 6 nafar mast fuqaro tez yordam xodimlarini kaltaklagani to‘g‘risida xabar berilgandi.
Izoh (0)