“Rosselxoznadzor” Rossiyaga Navoiy va Qashqadaryodagi oltita korxonadan pomidor olib kirishga ruxsat berdi

“Rosselxoznadzor” 2021-yil 3-martidan O‘zbekistonning 6 ta korxonasiga Rossiya hududiga pomidor olib kirishga ruxsat berdi. Bu haqda idora sayti orqali ma’lum qilindi.

Ushbu qaror Vazirlar Mahkamasi huzuridagi O‘simliklar karantini davlat inspeksiyasi kafolati ostida va pomidor jigarrang bujmayishi virusi yo‘qligiga oid laborator tadqiqotlar natijalari asosida qabul qilingan.

Taqiq olib tashlangan korxonalar Qashqadaryo va Navoiy viloyatlarida joylashgan:

• “Taraqqiyot sari servis” MChJ (Qashqadaryo viloyati);
• “Qashqadaryo parnik taraqqiyot invest” MChJ (Qashqadaryo viloyati);
• “Saidazimxon” MChJ (Qashqadaryo viloyati);
• “Zarafshon grand bolgari” MChJ (Navoiy viloyati);
• “Karmana Agrotrading” MChJ (Navoiy viloyati);
• “Maftunkor Bahor” MChJ (Navoiy viloyati).

Rossiya tomonidan 2020-yil 4 va 11-dekabrda pomidor jigarrang bujmayishi virusi aniqlangani sabab Qashqadaryo va Navoiy viloyatlaridagi korxonalarga taqiq qo‘yilgandi. 2021-yil 1-yanvardan boshlab Rossiyaga mazkur viloyatlardagi 34 korxonadan pomidor olib kirilishiga ruxsat berilgan.Avvalroq Rossiyaning O‘zbekistonning ayrim qishloq xo‘jaligi mahsulotlariga taqiq qo‘yishiga sabab bo‘lgan tashxis noto‘g‘ri bo‘lib chiqqani to‘g‘risida xabar berilgandi.