Zangiota tumanidagi ixtisoslashtirilgan yuqumli kasalliklar shifoxonalarida bemorlar ko‘payib ketgani va bo‘sh o‘rinlar qolmagani haqidagi xabarlar rad etildi. Bu haqda, Sog‘liqni saqlash vazirligi matbuot xizmatiga tayanib, “Gazeta.uz” xabar bermoqda.
Xabar berishlaricha, hozirda 4000 o‘ringa mo‘ljallangan Zangiotadagi ikkita shifoxonada “minglab bo‘sh o‘rinlar bor”. O‘rinlarga ehtiyoj yo‘qligi uchun 2-shifoxonaning “A” bloki to‘liq yopilgan, “B” blokning bitta bo‘limi va ikkinchi bo‘limining yarmi ham yopiq.
SSVdan qo‘shimcha qilishlaricha, so‘nggi kunlarda kasallanish holatlari soni oshib borayotganiga qaramay, “umumiy ahvol xabarlarda aytilganidek vahimali emas”, shu bois “asossiz xavotirga o‘rin yo‘q”, ammo sanitariya va gigiyena qoidalariga rioya qilish lozim.
Avvalroq 14-mart kuni O‘zbekistonda koronavirus infeksiyasini yuqtirib olish bilan bog‘liq 111 ta yangi holat aniqlangani, bu 2020-yil 24-dekabridan (112 ta holat) beri kuzatilgan eng yomon antirekord ekani haqida xabar berilgan edi.
Ushbu 111 ta holatning 93 tasi Toshkent shahrida aniqlangan. Umuman olganda, Toshkentda so‘nggi bir hafta ichida kasallanish holatlari soni keskin oshgan. Shu munosabat bilan shaharda karantin talablariga rioya qilinishi ustidan nazorat kuchaytirilishi ma’lum qilindi.
Izoh (0)