Зангиота туманидаги ихтисослаштирилган юқумли касалликлар шифохоналарида беморлар кўпайиб кетгани ва бўш ўринлар қолмагани ҳақидаги хабарлар рад этилди. Бу ҳақда, Соғлиқни сақлаш вазирлиги матбуот хизматига таяниб, «Gazeta.uz» хабар бермоқда.
Хабар беришларича, ҳозирда 4000 ўринга мўлжалланган Зангиотадаги иккита шифохонада «минглаб бўш ўринлар бор». Ўринларга эҳтиёж йўқлиги учун 2-шифохонанинг «А» блоки тўлиқ ёпилган, «Б» блокнинг битта бўлими ва иккинчи бўлимининг ярми ҳам ёпиқ.
ССВдан қўшимча қилишларича, сўнгги кунларда касалланиш ҳолатлари сони ошиб бораётганига қарамай, «умумий аҳвол хабарларда айтилганидек ваҳимали эмас», шу боис «асоссиз хавотирга ўрин йўқ», аммо санитария ва гигиена қоидаларига риоя қилиш лозим.
Аввалроқ 14 март куни Ўзбекистонда коронавирус инфекциясини юқтириб олиш билан боғлиқ 111 та янги ҳолат аниқлангани, бу 2020 йил 24 декабридан (112 та ҳолат) бери кузатилган энг ёмон антирекорд экани ҳақида хабар берилган эди.
Ушбу 111 та ҳолатнинг 93 таси Тошкент шаҳрида аниқланган. Умуман олганда, Тошкентда сўнгги бир ҳафта ичида касалланиш ҳолатлари сони кескин ошган. Шу муносабат билан шаҳарда карантин талабларига риоя қилиниши устидан назорат кучайтирилиши маълум қилинди.
Изоҳ (0)