2020-yilning avgustida Urgut tumanida Samarqand viloyatidagi eng katta masjid qurib, bitkazildi. 13-mart kuni mazkur jome masjidining ochilish marosimi bo‘lib o‘tdi, deb xabar beradi O‘zbekiston musulmonlari idorasi.
Ochilish marosimida Samarqand viloyati hokimi Erkinjon Turdimov, Urgut tumani hokimi Botir Jabborov, muftiy Usmonxon Alimov, Din ishlari bo‘yicha qo‘mita raisi Abdug‘ofur Ahmedov ishtirok etdi. Mehmonlarga Samarqand viloyati bosh imom-xatibi Zayniddin domla Eshonqulov, Diniy idora ish boshqaruvchisi Rustam hoji Jamilov hamrohlik qilgan.
Tadbir avvalida qurbonlik so‘yilgan va Qur’oni karim oyatlari tilovat qilingan.
“Yangi masjid qiblasi mutaxassislar quyoshning yozgi eng so‘nggi va qishdagi eng so‘nggi botish nuqtalari hisobga olinib, ushbu ikki nuqta oralig‘i uch qismga bo‘lib, chap tomondagi bo‘lak belgilandi. Shuningdek, kechasi ‘Oltin qoziq’ yulduziga qarab mo‘ljal olindi”, — deyiladi xabarda.
Ma’lumot uchun, masjid maydoni bir gektardan oshiq, xonaqosining hajmi 45x55 metr, ya’ni 2500 kvadrat metrni tashkil qiladi. Jome ikki qavatdan iborat bo‘lib, 8000 nafarga yaqin namozxonni o‘z bag‘riga sig‘dira oladi. Xonaqoh o‘rtasida 34 metrli baland gumbaz qad rostlagan. Uning aylanasi 18 metrni tashkil etadi.
Masjidning to‘rt tomonida ikkitasi 40 metrli va yana ikkitasi 43 metrli bo‘lgan to‘rt minora qurilgan. Zamonaviy tahoratxonadan bir vaqtning o‘zida 100 kishi foydalanishi mumkin. Masjid xodimlari uchun 2 qavatli ma’muriy bino barpo etilgan.
Eslatib o‘tamiz, Toshkentning Olmazor tumanida 3-mart kuni yangidan qurib bitkazilgan “Siroj solih” jome masjidining ochilish marosimi bo‘lgandi.
Izoh (0)