Toshkentning Chilonzor tumanida joylashgan “Troya” kafesida ommaviy mushtlashuv yuz berdi. Bu haqda Toshkent shahar IIBB axborot xizmati xabar berdi.
Ma’lum qilinishicha, mazkur hodisa 2021-yil 8-yanvar kuni 23:30 larda sodir bo‘lgan. Ichki ishlar organlari olib borgan dastlabki tergov harakatlari ma’lumotlariga ko‘ra, kafeda o‘tirgan mehmonlarning bir guruhi va qo‘shni stoldagi boshqa mijozlar o‘rtasida janjal yuzaga kelgan.
“Kafe qo‘riqchilari mehmonlarni tinchlantirishga harakat qilgan. Jazavaga tushgan mehmonlar ogohlantirishlarga qaramay, voqeani yanada keskinlashtirib yuborgan. Oqibatda mijozlar va kafe qo‘riqchilari o‘rtasida mushtlashuv yuzaga kelgan”, — deyiladi xabarda.
Kafe xodimlari ichki ishlar xodimlariga qo‘ng‘iroq qilish o‘rniga janjalni o‘zlari chaqirgan mushtumzo‘rlar bilan davom ettirgan.
Sud tibbiy ekspertizasining ma’lum qilishicha, uch nafar mijozning olgan tan jarohati sog‘lig‘ining qisqa muddatga buzilishiga olib kelgan. Ushbu janjalda jami 45 nafar odam ishtirok etgan. Mazkur holat yuzasidan Jinoyat kodeksining 277-moddasi (bezorilik) bilan jinoyat ishi qo‘zg‘atilgan bo‘lib, hozirda dastlabki tergov harakatlari olib borilmoqda.
Avvalroq Samarqanddagi kafe yaqinida janjallashgan shaxslar bir-birlariga da’volari yo‘qligiga qaramay, 3 sutkaga qamalgani, “Singapur” va “Vestminster” talabalari futbol uchrashuvidan so‘ng ommaviy mushtlashib ketgani to‘g‘risida xabar berilgandi.
Izoh (0)