Armaniston harbiylari Gazax tumanida o‘t ochishni to‘xtatish rejimini buzdi. Bu haqda Ozarbayjon Davlat chegara xizmati ma’lum qildi. Armaniston Mudofaa vazirligi esa buni “mutlaqo yolg‘on” deb atadi, deb yozadi “Kommersant”.

Arxiv

Foto: “RIA Novosti”

“2-fevral kuni tongda Armaniston Qurolli Kuchlari Gazax tumaniga qarata pulemyotdan 20 marta o‘q uzib, o‘t ochishni to‘xtatish rejimini buzdi”, — deyiladi Ozarbayjon Davlat chegara xizmati xabarida.

Ayni paytda Armaniston hukumati inson huquqlari bo‘yicha Yevropa sudiga Ozarbayjon ustidan davlatlararo shikoyatnoma berdi. Boku Tog‘li Qorabog‘dagi nizolar kuchayishi chog‘ida bir qator konvensiyalarni buzganlikda ayblanmoqda.

Bu Armaniston tomonidan inson huquqlari bo‘yicha Yevropa sudiga berilgan birinchi davlatlararo shikoyatdir, deyiladi mamlakatning Yevropa sudidagi vakolatxonasi xabarida. Ta’kidlanishicha, Yerevan Bokuni Qorabog‘ va Armaniston fuqarolarining yashash, qiynoqlar va shafqatsiz munosabatdan himoyalanish, daxlsizlik, egalik, shaxsiy va oilaviy hayot, ta’lim va boshqa bir qator huquqlarini buzganlikda ayblamoqda.

Shikoyatda harbiy asirlar va harbiy bo‘lmagan shaxslar, Qorabog‘ning qayta ko‘chirilgan aholisi, yaralangan fuqarolar va halok bo‘lganlarning qarindoshlari, o‘z mulklaridan ayrilgan shaxslar, mahalliy va xalqaro OAV vakillari huquqlarini himoya qilish masalalari ham ko‘tarilgan.

Qayd etilishicha, shikoyat bilan birga “ko‘p sonli dalillar” ham taqdim etilgan.

Eslatib o‘tamiz, Tog‘li Qorabog‘dagi nizo 2020-yil sentabrda kuchaydi. 2020-yil 10-noyabr kuni Rossiya, Ozarbayjon va Armaniston Tog‘li Qorabog‘da tinchlik haqida bitim imzoladi. Rossiya ishtirokidagi muzokaralar natijasiga ko‘ra, nizo tomonlari o‘t ochishni to‘xtatishga qaror qildi. 10-noyabrga o‘tar kechasi Armaniston bosh vaziri Nikol Pashinyan Ozarbayjon va Rossiya prezidentlari Ilhom Aliyev va Vladimir Putin bilan Tog‘li Qorabog‘da o‘t ochishni va jangovar harakatlarni to‘xtatish to‘g‘risida kelishuv imzoladi.

Sulh shartlari Kelbajar, Agdam, Lachin tumanlari va Gazax tumanida Armaniston tomoni egallab turgan hududlar Ozarbayjon nazorati ostiga berilishini nazarda tutadi.

Bahsli hududga 2 mingga yaqin Rossiya tinchlikparvarlari kiritiladi, ular o‘t ochishni to‘xtatish rejimiga rioya qilinishini nazorat qiladi. Shuningdek, tomonlar asirlar, marhumlarning jasadlarini ayirboshlashni boshlaydi va mintaqada transport qatnovini qayta tiklaydi.

Yanvar oxirida esa Moskvada mintaqa bo‘yicha uch tomonlama ishchi guruhning birinchi majlisi bo‘lib o‘tdi.