Buyuk Britaniya bosh vaziri Boris Jonson tomonidan 16-mart kuni rasman boshlanadigan xavfsizlik, mudofaa va tashqi siyosatni har tomonlama qayta ko‘rib chiqishda Rossiya “dushman davlat”, Xitoy esa “tijoriy raqib” deb ataladi. Bu haqda The Times gazetasi xabar berdi.
Gazetaning yozishicha, qayta ko‘rib chiqishda Rossiyaga “davlat darajasidagi eng katta tahdid” deb qaraladi. Bu Rossiyaning Buyuk Britaniya suv va havo hududiga qarshi “tez-tez tajovuzkor hujumlari” hamda Moskvaning “Britaniya tuprog‘ida o‘z raqiblarini o‘ldirishga” tayyorligi bilan bog‘liq.
“Britaniyaga asosiy tahdid Rossiyadan kelsa, Xitoy intellektual mulkni o‘g‘irlashga urinadigan va iqtisodiy xavfsizlikka tahdid soladigan raqib hisoblanadi Ammo bu bilan Solsberidagi voqealar nazarda tutilmayapti”, — dedi Britaniya hukumati manbasi The Times gazetasiga Sergey va Yuliya Skripallarning zaharlanishiga ishora qilib.
Hukumatning boshqa bir manbasiga ko‘ra, “Rossiya — dushman davlat, Xitoy — global muammo”. “Xitoyga nisbatan yondashuv quyidagicha bo‘lishi lozim: kerak bo‘lganda raqobatlashish, iloji bo‘lsa, hamkorlik qilish, kerak bo‘lganda qarshilik ko‘rsatish”, — deydi manba The Times gazetasiga.
Boris Jonsonning partiyasi a’zosi, quyi palataning tashqi ishlar bo‘yicha qo‘mita rahbari Tom Tugendxat Daily Mail bilan suhbatda hukumatning Xitoyga bo‘lgan munosabatini tanqid qildi: “O‘nlab yillar davomida Rossiyaning qudrati o‘g‘irlik va o‘z fuqarolariga nisbatan shafqatsizlik tufayli zaiflashdi, Xitoyning qudrati esa faqat o‘sdi. Raqobat halollikka asoslangan bo‘ladi. Bugun biz buni Xitoyda ko‘rmayapmiz”. Tugendxatning Xitoyga nisbatan pozitsiyasini Buyuk Britaniya Milliy kiberxavfsizlik markazining sobiq rahbari Kyaran Martin qo‘llab-quvvatladi, deb yozadi The Times.
Xavfsizlik, mudofaa va tashqi siyosatni keng qamrovli qayta ko‘rib chiqishda Buyuk Britaniyaning Moskva va Pekinga qarshi kiberfazodagi hujum imkoniyatlari uchun xarajatlarni oshirish rejalashtirilmoqda.
Avvalroq Rossiya va Xitoy Oy stansiyasini qurishda hamkorlik qilishga kelishib olgani haqida xabar berilgandi. AQSh esa Rossiya va Xitoyning koinotdagi imkoniyatlari yuzasidan xavotir bildirgan.
Izoh (0)