Boliviya sudi mamlakatda vaqtinchalik prezident vazifasini bajargan Janin Anyesni to‘rt oyga hibsga oldi. Bu haqda Anyes Twitter’da ma’lum qildi, deb yozadi “RBK”.
“Men aslida hech qachon bo‘lmagan to‘ntarishda ayblanib, sud jarayonini kutish uchun to‘rt oyga qamoqxonaga yuborilyapman”, — dedi Anyes.
Sobiq prezident vazifasini bajaruvchisi hibsga olingani haqida avvalroq xabar berilgandi. Mahalliy El Deber nashrining ta’kidlashicha, Anyes mamlakatning markaziy qismida joylashgan Trinidad shahridagi qarindoshlarining uyida hibsga olingan. Politsiya siyosatchini karovat ostidan topgan. Anyes terrorizm, fitna uyushtirish va isyonga da’vat qilishda ayblanmoqda.
Boliviyada 2019-yil 10-yanvar kuni o‘sha paytdagi davlat rahbari Evo Morales iste’foga chiqqanidan so‘ng Anyes prezident vazifasini bajaruvchi lavozimini egallagan edi. Undan avval 2019-yilning 20-oktabr kuni prezidentlik saylovlarida o‘sha paytda amaldagi davlat rahbari Morales ko‘pchilik ovoz bilan g‘olib bo‘lgan. Uning asosiy raqibi Karlos Mesa birinchi davrada raqibining g‘alabasini tan olmasligini ta’kidlagan.
Uch hafta davom etgan norozilik namoyishlaridan so‘ng Boliviya qurolli kuchlari rasmiylari Moralesdan iste’foga chiqishini so‘radi va u vaziyatni davlat to‘ntarishi deb baholagan holda lavozimini tark etdi va mamlakatdan chiqib ketdi.
Morales lavozimidan ketguniga qadar Aynes Senatning ikkinchi vitse-spikeri bo‘lib ishlagan va prezidentga qarshi bo‘lib kelgan. Boliviyada muxolifat kuchlari hokimiyat tepasiga kelganidan keyin ular Aynesning nomzodini qo‘llab-quvvatlagan.
2020-yilning yanvar oyida Aynes prezidentlik saylovlarida ishtirok etish niyatidaligini e’lon qildi, ammo sentabrda nomzodini qaytarib oldi va buning sababini kelgusi saylovlarda muxolifatni birlashtirish uchun, deb izohladi.
2020-yil oktabr oyida bo‘lib o‘tgan prezidentlik saylovlarda Morales tarafdori, sobiq iqtisodiyot vaziri Luis Arse 55,1 foiz ovoz bilan g‘alaba qozondi.
Eslatib o‘tamiz, Boliviyaning sobiq adliya vaziri Alvaro Koimbra va sobiq energetika vaziri Rodrigo Gusman 13-mart kuni, prokuraturaning fikriga ko‘ra, 2019-yilning noyabr oyida amalga oshirilgan davlat to‘ntarishi bo‘yicha tergovning bir qismi sifatida hibsga olindi.
Izoh (0)