Qirg‘iziston hukumatining Botken viloyatidagi vakolatxonasi O‘zbekistonning So‘x anklaviga koridor berilishi haqidagi ma’lumotlarni rad etdi, deb xabar beradi “Vesti.kg”.
Qayd etilishicha, O‘zbekistonning So‘x anklaviga koridor berilishi to‘g‘risidagi ma’lumotlar haqiqatga to‘g‘ri kelmaydi.
“11—12-mart kunlari ikki mamlakat rahbarlarining uchrashuvdan so‘ng, O‘zbekistonga So‘x anklavi uchun koridor taqdim etilishi to‘g‘risida noto‘g‘ri ma’lumot tarqaldi. Muzokaralar yakunida koronavirus pandemiyasi sabab yopilgan Botken viloyatining Qadamjoy tumanidagi ‘Qaytas’ nazorat-o‘tkazish punkti ishini qayta yo‘lga qo‘yishga kelishib olindi”, — deyiladi xabarda.
Shuningdek, ma’lum qilinishicha, O‘zbekiston fuqarolari nazorat-o‘tkazish punktidan oldingidek tartibda o‘tishlari mumkin.
“O‘zbekistonliklar Qirg‘izistonga ‘Qaytas’ nazorat-o‘tkazish punkti orqali kiradi va mamlakatimiz hududi orqali So‘x tumaniga boradi, qayta tekshiruv bilan yana O‘zbekistonning So‘x tumaniga kirishi mumkin. 2020-yilning martidan boshlab O‘zbekiston fuqarolari ushbu hududga faqatgina ‘Qadamjoy’ nazorat-o‘tkazish punkti orqali kira olardi”, — deyiladi xabarda.
Ta’kidlanishicha, “Qizil-Jildiz” o‘tkazish punktining ochilishi bilan fuqarolarning harkatlanishi osonlashadi.
“Trassadagi avtomobillar tirbandligi kamayadi. So‘x tumanini O‘zbekiston bilan bog‘lovchi aviaqatnovlar yo‘lga qo‘yiladi, shu maqsadda kichik samolyotlar parvoz qilishni boshlaydi. Shu munosabat bilan fuqarolarimizni xavotirlanmaslikka va tekshirilmagan ma’lumotlarga ishonmaslikni so‘raymiz”, — deyiladi xabarda.
Avvalroq Qirg‘iziston prezidenti matbuot kotibi Galina Bayterek Sadir Japarovning Toshkentga davlat tashrifi davomida “Qirg‘iziston So‘xga yo‘l ochishga, O‘zbekiston esa Unkar-Tooni berishga tayyor”ligini ma’lum qilgandi.
Mavzuga doir:
Izoh (0)