Myanmada namoyishlarni bostirish chog‘ida bir kunda 38 kishi halok bo‘ldi

Myanma shaharlarida bo‘layotgan norozilik harakatlarini bostirish chog‘ida 14-mart kuni 38 kishi halok bo‘ldi, 80 kishi jarohatlandi. Bu haqda Myanmaning Siyosiy mahbuslarga yordam ko‘rsatish assotsiatsiyasiga (SMYoA) tayanib, “Kommersant” xabar berdi.

Huquq himoyachilarining hisob-kitoblariga ko‘ra, fevral oyining boshida harbiylar hokimiyat tepasiga kelib, ommaviy namoyishlar boshlanganidan buyon mamlakatda kamida 126 nafar namoyishchi halok bo‘lgan. SMYoA qurbonlar soni bundan ham ko‘proq bo‘lishi mumkinligini rad etmagan.

Shu kungacha 2156 kishi hibsga olingan. Ularning 1837 nafari hozirgacha qamoqxonalarda saqlanmoqda. Ularning uch nafari qamoq jazosiga hukm qilindi, deb xabar bermoqda huquq himoyachilari.

Hukumatning rasmiy ma’lumotlariga ko‘ra, 14-mart kuni 23 kishi hibsga olingan. Ularning ma’lumotlari mamlakatda kuniga 100 ga yaqin odam hibsga olingananini aytayotgan huquq himoyachilarining ma’lumotlariga mos emas.

1-fevral kuni Myanma harbiylari davlat to‘ntarishini amalga oshirgan, hukumatning amaldagi rahbarlari hibsga olingan. Harbiylar Myanma davlat maslahatchisi Aun San Su Chjini 11 kilogramm oltin va 600 ming dollar pulni pora sifatida olganlikda ayblanmoqda. Davlat to‘ntarishidan keyin mamlakatning yirik shaharlarida norozilik namoyishlari boshlangan.

Mart oyining boshida ham Myanmadagi politsiya hamda ko‘chalarda namoyish o‘tkazayotgan fuqarolar o‘rtasidagi to‘qnashuvlarda huquq-tartibot idoralari xodimlarining o‘qotar quroldan foydalanishi oqibatida 38 kishining halok bo‘lgani ma’lum qilingan.

Ma’lumot uchun, Myanma aholisi 6-fevral kuni Yangon ko‘chalariga chiqib, harbiylar tomonidan hokimiyat egallab olinishiga qarshi chiqqan. Odamlar harbiylarga qarshi ekanini bildirmoqda, hibsga olingan yuqori martabali amaldorlarni, jumladan, davlat maslahatchisi Aun San Su Chji va prezident Vin Myinni ozod etishni talab qilmoqda.