Мьянма шаҳарларида бўлаётган норозилик ҳаракатларини бостириш чоғида 14 март куни 38 киши ҳалок бўлди, 80 киши жароҳатланди. Бу ҳақда Мьянманинг Сиёсий маҳбусларга ёрдам кўрсатиш ассоциациясига (СМЁА) таяниб, «Коммерсантъ» хабар берди.
Ҳуқуқ ҳимоячиларининг ҳисоб-китобларига кўра, февраль ойининг бошида ҳарбийлар ҳокимият тепасига келиб, оммавий намойишлар бошланганидан буён мамлакатда камида 126 нафар намойишчи ҳалок бўлган. СМЁА қурбонлар сони бундан ҳам кўпроқ бўлиши мумкинлигини рад этмаган.
Шу кунгача 2156 киши ҳибсга олинган. Уларнинг 1837 нафари ҳозиргача қамоқхоналарда сақланмоқда. Уларнинг уч нафари қамоқ жазосига ҳукм қилинди, деб хабар бермоқда ҳуқуқ ҳимоячилари.
Ҳукуматнинг расмий маълумотларига кўра, 14 март куни 23 киши ҳибсга олинган. Уларнинг маълумотлари мамлакатда кунига 100 га яқин одам ҳибсга олингананини айтаётган ҳуқуқ ҳимоячиларининг маълумотларига мос эмас.
1 февраль куни Мьянма ҳарбийлари давлат тўнтаришини амалга оширган, ҳукуматнинг амалдаги раҳбарлари ҳибсга олинган. Ҳарбийлар Мьянма давлат маслаҳатчиси Аун Сан Су Чжини 11 килограмм олтин ва 600 минг доллар пулни пора сифатида олганликда айбланмоқда. Давлат тўнтаришидан кейин мамлакатнинг йирик шаҳарларида норозилик намойишлари бошланган.
Март ойининг бошида ҳам Мьянмадаги полиция ҳамда кўчаларда намойиш ўтказаётган фуқаролар ўртасидаги тўқнашувларда ҳуқуқ-тартибот идоралари ходимларининг ўқотар қуролдан фойдаланиши оқибатида 38 кишининг ҳалок бўлгани маълум қилинган.
Маълумот учун, Мьянма аҳолиси 6 февраль куни Янгон кўчаларига чиқиб, ҳарбийлар томонидан ҳокимият эгаллаб олинишига қарши чиққан. Одамлар ҳарбийларга қарши эканини билдирмоқда, ҳибсга олинган юқори мартабали амалдорларни, жумладан, давлат маслаҳатчиси Аун Сан Су Чжи ва президент Вин Мйинни озод этишни талаб қилмоқда.
Мавзуга доир:
Изоҳ (0)