AstraZeneca vaksinasi atrofidagi shov-shuv davom etmoqda, Parij kasalxonalarida joy qolmadi, Moldovada favqulodda holat e’lon qilinadi. Koronaxabarlar

So‘nggi bir kecha-kunduzda yuz bergan koronavirus bilan bog‘liq eng muhim xabarlar — “Daryo” koronadayjestida.

Niderlandiya hukumati ikki haftaga, 28-martga qadar mamlakatda AstraZeneca Britaniya-Shvetsiya farmkompaniyasining koronavirusga qarshi vaksinasidan foydalanishni to‘xtatib qo‘ydi. Bunday qaror Daniya va Norvegiyadan kelib tushgan ehtimoliy ikkilamchi ta’sirlar haqidagi xabarlardan keyin qabul qilindi. Gap emlanganlarda tromblar hosil bo‘lishi xavfi haqida bormoqda. Hukumat bayonotida aytilishicha, Niderlandiyada bunday holatlar qayd etilganicha yo‘q, tromblar aynan vaksina oqibatida yuzaga kelishi borasida ham dalillar hozircha yo‘q. Niderlandiya hukumati Yevropa dori vositalari agentligi (EMA) tekshiruvi natijalarini kutmoqda. Vaksinadan foydalanishni to‘xtatib turish qarori tufayli vaksinatsiyaga yozilgan 43 ming kishini qaytarib yuborishga to‘g‘ri keladi.

Irlandiya Immunizatsiya kengashi hukumatga AstraZeneca vaksinasi bilan emlashni kechiktirishni maslahat berdi. Bunday tavsiya emlashdan keyin tromblar paydo bo‘lishi bo‘yicha yangi holatlar haqidagi xabarlardan keyin berildi. Rasman Irlandiya hukumati AstraZeneca’dan foydalanishni to‘xtatganicha yo‘q, ammo shu paytgacha doim Immunizatsiya kengashi tavsiyalariga rioya qilib kelgan.

Eslatib o‘tamiz, emlanganlarda tromblar paydo bo‘lishi bilan bog‘liq bir nechta holatlar haqidagi ma’lumotlardan keyin Daniya AstraZeneca vaksinasidan foydalanishni ikki haftaga to‘xtatib qo‘ygan edi. Daniyaning ortidan, AstraZeneca dorisi bilan emlashni to‘xtatish haqidagi qarorlarni Norvegiya va Islandiya ham qabul qildi. Ushbu mamlakatlar hukumatlari qayd etishicha, u yerlarda ikkilamchi ta’sirlar bilan bog‘liq holatlar kuzatilmagan, emlashning to‘xtatilishi esa Daniyadan olingan ma’lumotga asoslangan. 11-mart kuni Italiya ham AstraZeneca’dan foydalanishni to‘xtatib qo‘ydi. Bu 43 yoshli erkakning o‘limidan keyin yuz berdi: u vaksinatsiyaning ertasi kuni yurak to‘xtab qolishidan vafot etdi — hukumat ushbu ikki voqeaning bir-biriga bog‘liqligini aniqlashtirmoqchi.

AstraZeneca kompaniyasi esa o‘zida bor ma’lumotlar emlanganlarda tromblar hosil bo‘lishiga uning vaksinasi sababchi bo‘lganini tasdiqlamasligini ta’kidladi. Kompaniya Yevroittifoq va Buyuk Britaniyada emlangan 17 milliondan ortiq kishining sog‘lig‘i bilan bog‘liq ma’lumotlarni batafsil o‘rganib chiqqan. U yerlarda shu paytgacha 15 ta chuqur venalar trombozi, 22 ta o‘pka arteriyasi emboliyasi holatlari qayd etilgan. “Bu aholi o‘rtasida umuman kutilishi mumkin bo‘lganidan ancha kam”, — degan kompaniyadagilar. AstraZeneca uchun odamlarning xavfsizligi birinchi o‘rinda ekani, ammo tromblar paydo bo‘lishiga vaksina sababchi emasligi qayd etildi.

Fransiya hukumati Parij kasalxonalaridagi COVID-19’ga chalingan bemorlarni mamlakatning boshqa shaharlariga ko‘chirish qarori haqida e’lon qildi. Bir hafta ichida Il-de-Frans poytaxt mintaqasidan 100 ga yaqin bemor boshqa joylarga ko‘chiriladi. Boshqa shaharlarga poytaxt kasalxonalarining intensiv davolanish bo‘limlaridagi odamlar evakuatsiya qilinadi. Buning uchun hukumat maxsus jihozlangan poyezdlardan foydalanadi.

Ayni paytda Fransiyada taxminan 4,1 ming COVID-bemor intensiv terapiya bo‘limlarida adavolanmoqda, ularning 1,1 ming nafari Parij va uning atroflariga to‘g‘ri keladi. Fransiyada bir necha oylardan buyon kuchli cheklov choralari amal qilayotganiga qaramay, so‘nggi bir necha hafta davomida koronavirus tarqailishi sur’atlari oshib ketdi.

Moldovada ham koronavirus tarqailishi bilan bog‘liq vaziyat yomonlashuvi tufayli, Oliy xavfsizlik kengashi hukumatga va parlamentga mamlakatda ikki haftaga favqulodda holat e’lon qilishni tavsiya etdi. Kengash majlisida koronavirus oqibatidagi talafotlar har kuni samolyot halokatga uchrashidan ko‘riladigan talafotga qiyoslandi. Uch kun ichida yangi favqulodda holat rejasi ishlab chiqiladi va parlamentga taqdim etiladi. U yangi, yanada qat’iyroq cheklovlardan iborat bo‘lishi kutilmoqda.