London politsiyasi Suriya prezidenti Bashar Asadning rafiqasi Asma Asadga nisbatan dastlabki surishtiruv boshladi, u terrorizmga da’vat etganlikda gumon qilinmoqda, deb yozadi “RBK” The Sunday Times’ga tayanib.
Surishtiruv Guernica 37 xalqaro advokatlar hay’ati London politsiyasining terrorizmga qarshi kurash boshqarmasiga ikki marta xabar jo‘natganidan keyin boshlandi. Guernica huquqshunoslari bir necha oy davomida tekshiruv olib borgan, deyiladi hay’at relizida.
Ularning fikricha, Asma Asad Suriya Qurolli Kuchlarini qo‘llab-quvvatlab, omma oldida nutq so‘zlagan vaqtida terrorchilikka da’vat etgan. Murojaatnoma mualliflari, shuningdek, Asma Asadning Suriya boshqaruv sinfiga nisbatan ta’siri va harbiylarni qo‘llab-quvvatlashi bo‘yicha dalillarni ham yuborgan.
Asadning sudga kelishi ehtimoli kam, shuningdek, prokurorlar sirtdan ishlashda davom etishni istash-istamasligi noma’lum. Bundan tashqari, Asma Asad Britaniya fuqaroligidan mahrum qilinishi mumkin.
London politsiyasi harbiy jinoyatlar bilan shug‘ullanuvchi bo‘linma Suriyadagi mojarolar bilan bog‘liq murojaatni qabul qilganini tasdiqladi. Ayni paytda u ko‘rib chiqilmoqda.
Asma Asad Londonda suriyaliklar oilasida tug‘ilgan, u hozir 45 yoshda. U moliyaviy sektorda, xususan, Deutsche Bank’da, shuningdek, J.P.Morgan’ning Nyu-Yorkdagi ofisida ishlagan. 2000-yil noyabrida u Suriyaga qaytib, dekabrda prezident Bashar Asadga turmushga chiqqan.
Asma Asadga, shuningdek, Bashar Asadning boshqa yaqin qarindoshlariga qarshi AQSh va Yevroittifoq sanksiyalar kiritgan. Bryussel ularning Yevroittifoqqa kirishini taqiqlagan va ularning aktivlarini bloklagan. Ammo Asma Asadda Britaniya fuqarosi sifatida mamlakatga kirish huquqi bo‘lgan.
AQSh Sezar qonuni deb ataluvchi hujjat bo‘yicha sanksiyalar kiritgan, u Asadning rejimini qo‘llab-quvvatlaydigan shaxslarga nisbatan cheklovlar kiritilishini ko‘zda tutadi.
Avvalroq Suriya prezidenti Bashar Asad va uning rafiqasi Asma Asadda koronavirus infeksiyasi aniqlangan, ular o‘zini yakkalash rejimiga o‘tgani va ahvoli yaxshi ekani xabar berilgan edi.
2019-yilda esa Asma Asad bir yillik davolanishdan so‘ng onkologik kasallikni yenggani ma’lum bo‘lgan edi.
Izoh (0)