Боливия суди мамлакатда вақтинчалик президент вазифасини бажарган Жанин Аньесни тўрт ойга ҳибсга олди. Бу ҳақда Аньес Twitter’да маълум қилди, деб ёзади «РБК».
«Мен аслида ҳеч қачон бўлмаган тўнтаришда айбланиб, суд жараёнини кутиш учун тўрт ойга қамоқхонага юбориляпман», — деди Аньес.
Собиқ президент вазифасини бажарувчиси ҳибсга олингани ҳақида аввалроқ хабар берилганди. Маҳаллий Эл Дебер нашрининг таъкидлашича, Аньес мамлакатнинг марказий қисмида жойлашган Тринидад шаҳридаги қариндошларининг уйида ҳибсга олинган. Полиция сиёсатчини кароват остидан топган. Аньес терроризм, фитна уюштириш ва исёнга даъват қилишда айбланмоқда.
Боливияда 2019 йил 10 январь куни ўша пайтдаги давлат раҳбари Эво Моралес истеъфога чиққанидан сўнг Аньес президент вазифасини бажарувчи лавозимини эгаллаган эди. Ундан аввал 2019 йилнинг 20 октябрь куни президентлик сайловларида ўша пайтда амалдаги давлат раҳбари Моралес кўпчилик овоз билан ғолиб бўлган. Унинг асосий рақиби Карлос Меса биринчи даврада рақибининг ғалабасини тан олмаслигини таъкидлаган.
Уч ҳафта давом этган норозилик намойишларидан сўнг Боливия қуролли кучлари расмийлари Моралесдан истеъфога чиқишини сўради ва у вазиятни давлат тўнтариши деб баҳолаган ҳолда лавозимини тарк этди ва мамлакатдан чиқиб кетди.
Моралес лавозимидан кетгунига қадар Айнес Сенатнинг иккинчи вице-спикери бўлиб ишлаган ва президентга қарши бўлиб келган. Боливияда мухолифат кучлари ҳокимият тепасига келганидан кейин улар Айнеснинг номзодини қўллаб-қувватлаган.
2020 йилнинг январь ойида Айнес президентлик сайловларида иштирок этиш ниятидалигини эълон қилди, аммо сентябрда номзодини қайтариб олди ва бунинг сабабини келгуси сайловларда мухолифатни бирлаштириш учун, деб изоҳлади.
2020 йил октябрь ойида бўлиб ўтган президентлик сайловларда Моралес тарафдори, собиқ иқтисодиёт вазири Луис Арсе 55,1 фоиз овоз билан ғалаба қозонди.
Эслатиб ўтамиз, Боливиянинг собиқ адлия вазири Альваро Коимбра ва собиқ энергетика вазири Родриго Гусман 13 март куни, прокуратуранинг фикрига кўра, 2019 йилнинг ноябрь ойида амалга оширилган давлат тўнтариши бўйича терговнинг бир қисми сифатида ҳибсга олинди.
Изоҳ (0)