Ijtimoiy tarmoqlarda Buxoro davlat universiteti o‘qituvchisi 8 mart — Xalqaro xotin-qizlar kuni munosabati bilan talabalari unga 300 ming so‘mlik sovg‘a bergani uchun po‘pisa qilgani haqida xabarlar tarqaldi.
Unda aytilishicha, talablar guruh rahbariga gullar va 200 ming so‘m pul sovg‘a qilgan. Ammo aftidan, o‘qituvchi bu sovg‘adan qoniqmagan va o‘z obro‘-e’tiboriga arzimas narsalar bilan dog‘ tushirmasligini, berilgan sovg‘ani qaytarib yuborishini aytgan. O‘qituvchining talabaga yozgan bu yozishmalari skrinshotini boshqa talaba internetda tarqatgan, shu sababli o‘qituvchi o‘ch olish maqsadida yakuniy imtihonda ularni “o‘ynatish” bilan tahdid qilgan.
Ushbu holatga Oliy va o‘rta maxsus ta’lim vazirligi e’tibor qaratdi. Vazirlik matbuot xizmatining ma’lum qilishicha, o‘rganishlardan so‘ng mazkur o‘qituvchi bilan tuzilgan mehnat shartnomasi bekor qilingan.
Vazirlik tizimda korrupsiyaning har qanday ko‘rinishi hamda manfaatlar to‘qnashuviga nisbatan murosasiz munosabatda bo‘lishini va shu kunlarda oliy ta’lim tizimida korrupsiyaga qarshi “komplayens nazorat” tizimi joriy etilayotganini ta’kidlab o‘tgan.
“Jamoatchilik nazoratini amalga oshirgan ijtimoiy tarmoqlar vakillari va talabalarimizga minnatdorchilik bildiramiz va bu holat barcha oliy ta’lim muassasalarida muhokama qilinishini ma’lum qilamiz”, — deyiladi Oliy va o‘rta maxsus ta’lim vazirligi xabarida.
Avvalroq O‘zbekistondagi barcha ta’lim muassasalarida korrupsiyaga qarshi kurash bo‘yicha maxsus kurslar joriy etilishi haqida xabar berilgan edi.
Mavzuga doir:
Izoh (0)