Markaziy bank narxlar ko‘tarilishi borasida prognozini saqlab qolib, 2021-yildagi asosiy xatarlarni sanab o‘tdi

Markaziy bankning bazaviy prognozlariga ko‘ra, 2021-yil yakuni bo‘yicha inflyatsiya 9—10 foiz bo‘lishi kutilmoqda, deb yozmoqda Spot.

Qayd etilishicha, quyidagi bir necha omillar hisobiga narxlar ko‘tarilishini jilovlash mumkin:

• qat’iy pul-kredit sharoitlarini saqlab qolish;
• karantin choralari ta’sirini bosqichma-bosqich tugatish;
• so‘mning 2020-yil aprelidagi keskin qadrsizlanishi ta’sirining pasayishi.

Narxlarning umumiy darajasiga aksiz solig‘ining ko‘tarilishi va oziq-ovqat mahsulotlari narxining mavsumiy o‘sishi ham ta’sir qilishi mumkin. Yana bir xatar kelgusi oylarda sezilarli o‘sish kutilayotgan qurilish sohasi bilan bog‘liq — sement va boshqa qurilish materiallari narxlarining o‘sishi ko‘pincha boshqa narsalarning ham narxi ko‘tarilishiga olib keladi.

Shu munosabat bilan Markaziy bank raqobatni kuchaytirish hisobiga tovar va xizmatlar hajmini oshirish zarur, deb hisoblaydi.

Avvalroq Markaziy bank 2021-yilda inflyatsiya 11—12,5 foiz atrofida bo‘lishini prognoz qilgan, buni iqtisodiyotda vujudga kelayotgan vaziyat va davom etayotgan pandemiya sharoitidagi noaniqlik bilan izohlagandi. Markaziy bank Moliya vazirligining prognozlariga qaramay, 2023-yilda inflyatsiya 5 foizga yetishiga ishonmoqda.