Ижтимоий тармоқларда Бухоро давлат университети ўқитувчиси 8 март — Халқаро хотин-қизлар куни муносабати билан талабалари унга 300 минг сўмлик совға бергани учун пўписа қилгани ҳақида хабарлар тарқалди.
Унда айтилишича, талаблар гуруҳ раҳбарига гуллар ва 200 минг сўм пул совға қилган. Аммо афтидан, ўқитувчи бу совғадан қониқмаган ва ўз обрў-эътиборига арзимас нарсалар билан доғ туширмаслигини, берилган совғани қайтариб юборишини айтган. Ўқитувчининг талабага ёзган бу ёзишмалари скриншотини бошқа талаба интернетда тарқатган, шу сабабли ўқитувчи ўч олиш мақсадида якуний имтиҳонда уларни «ўйнатиш» билан таҳдид қилган.
Ушбу ҳолатга Олий ва ўрта махсус таълим вазирлиги эътибор қаратди. Вазирлик матбуот хизматининг маълум қилишича, ўрганишлардан сўнг мазкур ўқитувчи билан тузилган меҳнат шартномаси бекор қилинган.
Вазирлик тизимда коррупциянинг ҳар қандай кўриниши ҳамда манфаатлар тўқнашувига нисбатан муросасиз муносабатда бўлишини ва шу кунларда олий таълим тизимида коррупцияга қарши «комплаенс назорат» тизими жорий этилаётганини таъкидлаб ўтган.
«Жамоатчилик назоратини амалга оширган ижтимоий тармоқлар вакиллари ва талабаларимизга миннатдорчилик билдирамиз ва бу ҳолат барча олий таълим муассасаларида муҳокама қилинишини маълум қиламиз», — дейилади Олий ва ўрта махсус таълим вазирлиги хабарида.
Аввалроқ Ўзбекистондаги барча таълим муассасаларида коррупцияга қарши кураш бўйича махсус курслар жорий этилиши ҳақида хабар берилган эди.
Изоҳ (0)