Qirg‘iziston O‘zbekiston anklav hududi — So‘xga yo‘l ochishga, O‘zbekiston esa Unkar-Tooni berishga tayyor. Bu haqda Qirg‘iziston prezidenti matbuot kotibi Galina Bayterek Sadir Japarovning Toshkentga davlat tashrifi sarhisobida ma’lum qildi, deb xabar bermoqda “Gazeta.uz” “AKIpress”ga tayanib.
Uning aytishicha, O‘zbekiston—Qirg‘iziston davlat chegarasini delimitatsiya va demarkatsiya qilish masalalarida ikkala tomon ham bu ishlarni yaqin uch oy ichida yakunlash kerak, degan xulosaga keldi. Davlat chegarasini qonuniy ro‘yxatdan o‘tkazishni yakunlash chegaraoldi hududlarda barqarorlikni mustahkamlab, ikki tomonlama aloqalarni rivojlantirishga yangi turtki berishini qayd etgan.
Galina Bayterekning ma’lum qilishicha, yaqin orada davlat chegarasidagi 7 ta nazorat punkti faoliyati tiklanadi. Uning so‘zlariga ko‘ra, O‘zbekiston yuk tashish masalasini hal qilishga va zarur hollarda hujjatlarni skanerlash uchun tegishli uskunalar bilan ta’minlashga va’da bergan.
“Qirg‘iziston tomoni Qirg‘iziston hududida joylashgan O‘zbekistonning So‘x anklaviga transport va avia aloqalarni ochishga tayyor. Anklav aholisi davlat chegarasi orqali erkin harakatlanishi mumkin. O‘z navbatida O‘zbekiston Qirg‘izistonga shu vaqtga qadar chegara hududi aholisi o‘rtasida bahs va siyosiy ziddiyatlarga sabab bo‘lib kelgan Unkar-Too hududini berishga tayyor”, — degan Prezident matbuot kotibi Galina Bayterek.
Galina Bayterek davlat chegaralarini delimitatsiya qilish bilan bog‘liq qolgan bahsli masalalarni maxsus komissiya hal qilishini aytib o‘tgan.
“Gazeta.uz”ning qayd etishicha, Farg‘ona viloyati hokimi Xayrullo Bozorov va Qirg‘iziston hukumatining Botken viloyatidagi muxtor vakili Omurbek Suvanaliyev viloyatlarning chegara hududida o‘tish punktlari ochilishini ma’lum qilgan. Chegara post xizmati dastlab piyodalar uchun, uch oy ichida esa avtomobillar uchun ochilishi aytilgan. Omurbek Suvanaliyev bunga qadar ko‘proq yopilish va kamroq aloqa siyosati bo‘lganini ta’kidlagan.
Bundan avval prezident Shavkat Mirziyoyev O‘zbekiston va Qirg‘iziston davlat chegarasini delimitatsiya qilish masalalarini uch oy ichida hal etish ko‘zda tutilganini ma’lum qilgan. Davlat rahbari “odamlar kutayotgan ba’zi masalalar tez orada, byurokratiyasiz va aniq hal qilinishi”ni ta’kidlagan.
2016-yil avgust oyining o‘rtalarida Jalolobod viloyatidagi Orto-Tokoy suv ombori yaqinida O‘zbekiston militsiya xodimi qo‘lga olingandi. Bunga javoban O‘zbekiston huquq-tartibot xodimlari o‘zbek-qirg‘iz chegarasining Unkar-Tooning kelishilmagan qismida vertolyotdan tushib, teleminoraning to‘rt ishchisini qo‘lga olgan. O‘zbekiston qo‘lga olingan militsiya xodimini ozod qilishni va suv ombori atrofidagi postlarni olib tashlashni talab qilgan. Xodim 23-avgust kuni jarimaga tortilib, qo‘yib yuborilgan, Qirg‘iziston fuqarolari 9-sentabr kuni ozod qilingan.
Izoh (0)