BMTning Bolalar jamg‘armasi (YuNISEF) 12-mart kuni Buxoro viloyatining Sanitariya-epidemiologik osoyishtalik va jamoat salomatligi xizmati vaksinalarni saqlash uchun sovitish omborini topshirdi, deb xabar berdi “Gazeta.uz”.
Ta’kidlanishicha, mazkur uskuna vaksinalarni sovitish, haroratni nazorat qilish moslamalari, sovitish xonalari va vaksinalar yetkaziladigan konteynerlarni o‘z ichiga oladi.
Vaksinalar omborida 41,5 ming nafar bolani (1 yoshgacha bo‘lgan) emlash uchun taxminan 9000 litr vaksinani saqlash mumkin. Uskuna vaksinalarni Selsiy bo‘yicha 2−8 daraja iliq haroratda saqlash imkonini beradi.
“Biz og‘ir davrlarni boshdan kechirmoqdamiz va COVID-19 pandemiyasi YuNISEF ko‘p yillardan buyon targ‘ib etayotgan da’vatni bera oldi. Shu nuqtayi nazardan, vaksinalar va immunizatsiya bo‘yicha Global alyans ko‘magi bilan bizning bugungi hissamiz juda muhimdir”, — dedi YuNISEFning O‘zbekistondagi vakolatxonasi rahbari Munir Mammedzade.
Qayd etilishicha, 2017-yildan beri YuNISEF butun O‘zbekiston bo‘ylab jami 21 ta vaksina omborlari qurilishini qo‘llab-quvvatlagan. Hozirgi vaqtda hajmi 10 dan 40 kubometrgacha bo‘lgan 17 ta vaksina omborlari yong‘in va xavfsizlik signalizatsiya tizimlari, shuningdek yuk ortish-tushirish uskunalari, sovutkichlar, muzlatkichlar va muzlatish kameralari, haroratni nazorat qilish moslamalari va generatorlar bilan jihozlangan. Shuningdek, YuNISEF xodimlar uchun himoya kiyimlarini ham taqdim etadi.
Ma’lum qilinishicha, 2021-yilda yana to‘rtta omborxona foydalanishga topshiriladi. YuNISEF shuningdek, xodimlarni o‘qitish, sovitish zanjirili obyektlaridan, muzlatgichli yuk mashinalari, vaksinalar konteynerlari va muzlatish kameralaridan foydalanishda kerak bo‘ladigan qo‘llanmalarni taqdim etishda ko‘maklashadi.
Avvalroq O‘zbekistonga koronavirusga qarshi AstraZeneca vaksinasining dastlabki partiyasi 20-martga qadar keltirilishi kutilayotgani, O‘zbekistonda emlangan aholiga emlanganlik haqida sertifikat berilishi hamda O‘zbekiston koronavirusga qarshi 1 million doza ZF-UZ-VAC 2001 xitoy—o‘zbek vaksinasini sotib olish bo‘yicha kelishuvga erishgani haqida xabar berilgandi.
Izoh (0)