Toshkentda haydovchilik guvohnomasini olish uchun o‘qishga kirgan fuqaroning darslarga qatnashmasligi va tibbiy daftarni tayyorlab berish evaziga undan 1,5 million so‘m talab qilgan Mirobod o‘quv sport-texnika klubi direktori qo‘lga olindi, deb xabar beradi poytaxt IIBB.
O‘tkazilgan tezkor tadbirda 1988-yilda tug‘ilgan direktor talab qilingan puldan 100 AQSh dollari va 300 ming so‘m olgan vaqtida ushlangan.
Shuningdek, Yunusobod tumanida “Vatanparvar” DUKning o‘quv sport-texnika klubi direktori o‘qishga kirgan fuqarodan “B” toifadagi o‘quv kursiga qabul qilinishi uchun jami 6 million so‘m talab qilgan. Direktor shundan 600 ming so‘mi tibbiy daftarni rasmiylashtirishga, 4 million so‘mi kassa to‘loviga, qolgan 1,4 million so‘mi darslarda qatnashmaslik uchunligini aytgan.U talab qilingan puldan 300 AQSh dollarini olgan vaqtida daliliy ashyolar bilan qo‘lga tushgan.
Mazkur holatlar bo‘yicha Jinoyat kodeksining tegishli moddalari bilan jinoyat ishi qo‘zg‘atilgan va dastlabki tergov harakatlari olib borilmoqda.
Avvalroq Sirdaryoda Davlat soliq boshqarmasi bo‘lim boshlig‘i 1000 dollar pora bilan qo‘lga tushgani, Jizzaxda daraxtlarning kesilganini yashirish uchun pora talab qilgan atrof-muhitni muhofaza qilish xodimi ushlangani hamda Qo‘qon davlat pedagogika institutiga o‘qishga kiritib qo‘yishni va’da qilib, 3 ming dollar olgan dekanga sud hukmi o‘qilgani haqida xabar berilgandi.
Izoh (0)