Toshkent viloyatida o‘tkazilayotgan “zarbdor oyligi” doirasida tezkor xodimlar taxminiy narxi 1 milliard so‘mlik giyohvandlik va psixotrop dori vositalarining noqonuniy aylanmasiga chek qo‘ydi, deb xabar bermoqda viloyat IIB matbuot xizmati.
3-mart kuni Toshkent tumani IIB Jinoyat qidiruv boshqarmasi tezkor xodimlari tomonidan o‘tkazilgan tadbir davomida 1984-yilda tug‘ilgan M.K. va sherigi 1988-yilda tug‘ilgan L.A. nazoratdagi arizachiga 15 ta konvalyutadagi jami 150 dona “Tramadol” tabletkasini 300 ming so‘mga sotayotgan vaqtida ushlangan.
Ular dorilarni M. ismli shaxsdan olganligini aytgan va tadbir davom ettirilib, M.Z. ham 43 ta konvalyutadagi jami 430 dona “Tramadol” va 33 dona “Tropikomid” tabletkasini shartli xaridorga sotayotganida qo‘lga olingan.
Mazkur dori vositasining asosiy manbasini aniqlash va jinoyatga butunlay chek qo‘yish maqsadida tezkor tadbir davom ettirilib, olingan ma’lumotga asosan, Toshkent tumanida yashovchi 1984-yilda tug‘ilgan A.J.ning xonadoni belgilangan tartibda xolislar ishtirokida ko‘zdan kechirilgan. Terkshiruv davomida A.J. 5789 dona “Tramadol” va 8640 dona “Selofen” kuchli ta’sir qiluvchi psixotrop dori vositasi saqlayotganligi aniqlanib, daliliy ashyo sifatida hujjatlashtirilib olingan.
Ta’kidlanishicha, Toshkent tumani IIB tezkor xodimlar tomonidan o‘tkazilgan tadbir natijasida taxminiy bozor narxi 1 milliard so‘mga teng bo‘lgan jami 6239 dona “Tramadol” giyohvandlik dori vositasi va 8640 dona “Selofen” hamda 33 dona “Tropikomid” kuchli ta’sir qiluvchi psixotrop dori vositasi daliliy ashyo sifatida olinib, besh nafar shaxs ushlangan.
Hozirda mazkur holat yuzasidan Toshkent tumani IIB huzuridagi tergov bo‘limi tomonidan Jinoyat kodeksining 273-moddasi 5-qismi (giyohvandlik vositalari, ularning analoglari yoki psixotrop moddalarni ko‘p miqdorda qonunga xilof ravishda sotish) bilan jinoyat ishi qo‘zg‘atilib, yuqorida qayd etilgan shaxslar protsessual tartibda ushlangan.
Izoh (0)