БМТнинг Болалар жамғармаси (ЮНИСЕФ) 12 март куни Бухоро вилоятининг Санитария-эпидемиологик осойишталик ва жамоат саломатлиги хизмати вакциналарни сақлаш учун совитиш омборини топширди, деб хабар берди «Gazeta.uz».
Таъкидланишича, мазкур ускуна вакциналарни совитиш, ҳароратни назорат қилиш мосламалари, совитиш хоналари ва вакциналар етказиладиган контейнерларни ўз ичига олади.
Вакциналар омборида 41,5 минг нафар болани (1 ёшгача бўлган) эмлаш учун тахминан 9000 литр вакцинани сақлаш мумкин. Ускуна вакциналарни Цельсий бўйича 2−8 даража илиқ ҳароратда сақлаш имконини беради.
«Биз оғир даврларни бошдан кечирмоқдамиз ва COVID-19 пандемияси ЮНИСЕФ кўп йиллардан буён тарғиб этаётган даъватни бера олди. Шу нуқтаи назардан, вакциналар ва иммунизация бўйича Глобал альянс кўмаги билан бизнинг бугунги ҳиссамиз жуда муҳимдир», — деди ЮНИСЕФнинг Ўзбекистондаги ваколатхонаси раҳбари Мунир Маммедзаде.
Қайд этилишича, 2017 йилдан бери ЮНИСЕФ бутун Ўзбекистон бўйлаб жами 21 та вакцина омборлари қурилишини қўллаб-қувватлаган. Ҳозирги вақтда ҳажми 10 дан 40 кубометргача бўлган 17 та вакцина омборлари ёнғин ва хавфсизлик сигнализация тизимлари, шунингдек юк ортиш-тушириш ускуналари, совуткичлар, музлаткичлар ва музлатиш камералари, ҳароратни назорат қилиш мосламалари ва генераторлар билан жиҳозланган. Шунингдек, ЮНИСЕФ ходимлар учун ҳимоя кийимларини ҳам тақдим этади.
Маълум қилинишича, 2021 йилда яна тўртта омборхона фойдаланишга топширилади. ЮНИСЕФ шунингдек, ходимларни ўқитиш, совитиш занжирили объектларидан, музлатгичли юк машиналари, вакциналар контейнерлари ва музлатиш камераларидан фойдаланишда керак бўладиган қўлланмаларни тақдим этишда кўмаклашади.
Аввалроқ Ўзбекистонга коронавирусга қарши AstraZeneca вакцинасининг дастлабки партияси 20 мартга қадар келтирилиши кутилаётгани, Ўзбекистонда эмланган аҳолига эмланганлик ҳақида сертификат берилиши ҳамда Ўзбекистон коронавирусга қарши 1 миллион доза ZF-UZ-VAC 2001 хитой—ўзбек вакцинасини сотиб олиш бўйича келишувга эришгани ҳақида хабар берилганди.
Изоҳ (0)