Арманистон президентининг тиббий кўрикдан кейин яна ўз ишига қайтгани хабар қилинди

Арманистон президенти Армен Саркисян тиббий текширувлардан кейин яна ўз ишига қайтди. Бу ҳақда мамлакат президентининг матбуот хизматига таяниб, «ТАСС» хабар берган.

«Президент тиббиёт марказида текширувлардан ўтди. Кўрик якунига етди ва давлат раҳбари одатий иш тартибига қайтди», – дейилади хабарда.

Аввалроқ Саркисяннинг коронавирус инфекциясидан тузалганидан кейин касаллик асоратларидан азият чекаётгани ва юракни стендлаш амалиётини ўтказиш учун касалхонага ётқизилгани ҳақида хабар берилганди.

Арманистон президенти 13 март куни бош вазир Никол Пашинян билан мамлакатдаги сиёсий инқироздан чиқиш бўйича маслаҳатлашувлар ўтказишни режалаштиргани маълум қилинган эди. Бироқ Пашинян Саркисяннинг таклифига жавоб қайтармаган. «Ватанни қутқариш учун ҳаракат» мухолифат бирлашмаси Вазирлар Маҳкамаси таркиби истеъфо берса мазкур масалаҳатлашувларда иштирок этишга тайёрлигини билдирган.

Парламентдаги мухолифат фракция вакиллари ҳам 13 март куни президент, бош вазир ва мамлакатдаги бошқа сиёсий кучлар билан музокара олиб боришга тайёрлигини қайд этган.

Эслатиб ўтамиз, Арманистон президентининг матбуот хизмати 2021 йил 5 январда Лондонда Янги йил байрамини оиласи билан нишонлаган Саркисяннинг коронавирусга чалинганини тасдиқлаган. Арманистон давлат раҳбари февраль бошида мамлакатга қайтган ва ўз уйида COVID-19’дан даволанишни давом эттирган эди.

2021 йил 1 мартда Арманистонда бош вазирга қарши намойишчилар ҳукумат биносига бостириб кирган, кейинчалик Ереванда полиция Арманистон президенти Армен Саркисяннинг қароргоҳини қатъий қўриқлов остига олганди. Арманистон президенти бош вазир Никол Пашинян томонидан таклиф қилинган Бош штаб бошлиғи Оник Гаспарян истеъфоси ҳақидаги фармон лойиҳасини икки марта рад этган, Бош штаб бошлиғи қонуний тартибда лавозимидан озод этилган.

Фармон эълон қилингандан сўнг, мамлакат раҳбари Армен Саркисян Конституциявий судга мурожаат қилиб, ундан 2018 йилда киритилган «Ҳарбий хизмат ва ҳарбий хизматчиларнинг мақоми тўғрисида»ги қонунга киритилган ўзгартиришларнинг конституцияга мувофиқлигини текширишни сўраган.