Xalqaro havo qatnovlari 2021-yilning ikkinchi choragida tiklana boshlashi kutilmoqda. Bu haqda Xalqaro havo transporti assotsiatsiyasi (IATA) rahbari Aleksandr de Jyunyak ma’lum qildi, deb yozadi “Interfaks”.
Aleksandr de Jyunyakning so‘zlariga ko‘ra, chegaralar ochilgandan keyin turistik safarlar bo‘yicha keskin o‘sish kuzatiladi. Biznes segmentining tiklanish sur’ati pastroq kechadi, shu bilan birga, yil oxiriga qadar sayohatchilarning umumiy soni baribir pandemiya boshlanishidan avvalgi darajadan past bo‘ladi.
“Ehtimol, shu yilning may yoki iyun oylaridan keyin aviasayohat sohasida o‘zgarishlarni ko‘ra boshlaymiz”, — dedi de Jyunyak. — IATA’da biz allaqachon davlatlar bilan chegaralarni ochish yuzasidan shartnomalar tuzish va yo‘l xaritalarini ishlab chiqish masalalari bo‘yicha ish olib boryapmiz”.
Shuningdek, u assotsiatsiya tomonidan ishlab chiqilgan sayohat pasporti mobil dasturi — Travel Pass haqida eslatib o‘tdi, unda yo‘lovchining emlash tarixi va COVID-19’ga topshirgan testi natijalarini ko‘rish mumkin.
Singapore Airlines aviakompaniyasi kelgusi haftadan boshlab Singapur—London yo‘nalishi bo‘yicha Travel Pass’ni sinovdan o‘tkazishni boshlashini e’lon qildi.
IATA’ning so‘nggi ma’lumotlariga ko‘ra, 2021-yilning yanvar oyida dunyo bo‘ylab aviareyslarda yo‘lovchi tashish hajmi 2019-yilning yanvar oyiga nisbatan 72 foizga, xalqaro yuk tashish hajmi esa 85,6 foizga kamaygan. 2020-yili pandemiya sababli aviatsiya sohasida misli ko‘rilmagan og‘ir vaziyat yuzaga kelgani sababli, uyushma joriy yilni 2019-yil bilan taqqoslab keltirdi.
Ma’lumot uchun IATA tarkibiga dunyo bo‘ylab 290 ta aviakompaniya kiradi, bu global havo qatnovining, taxminan, 82 foizini tashkil qiladi.
Avvalroq 2020-yilda xalqaro sayohatlar soni 1 milliardga yoki 74 foizga kamaygani, shu tariqa o‘tgan yil turizm uchun kuzatishlar tarixidagi eng yomon yilga aylangani haqida xabar berilgandi. Xabarga ko‘ra, inqiroz sayyohlik sohasida 100-120 milliontagacha ish o‘rinlarining yo‘q bo‘lib ketish xavfini keltirib chiqardi, ularning aksariyati kichik va o‘rta biznesga to‘g‘ri keladi.
Izoh (0)