2021-yil 1-apreldan 1-oktabrgacha sement mahsulotini (TIF TN kodi 2523) O‘zbekistonga olib kirishda bojxona bojining nol stavkasi qo‘llaniladi. Bu haqda Prezidentning “Bozor tamoyillariga asoslangan ipoteka kreditlarini ajratish orqali aholini uy-joy bilan ta’minlashga oid qo‘shimcha chora-tadbirlar to‘g‘risida”gi farmonida belgilangan.
Bundan maqsad — mamlakatda qurilayotgan uy-joylar narxini arzonlashtirish. Hozirda boj stavkasi bojxona qiymatining 30 foizini tashkil etmoqda.
11-mart kuni Markaziy bank tomonidan e’lon qilingan sharhda yaqin oylarda qurilish sohasidagi o‘sish o‘tgan yilgiga nisbatan oshishi kutilayotgani qayd etilgan. Bu esa sement va boshqa qurilish materiallari narxining oshishiga olib keladi. “Shu munosabat bilan ichki bozorda tovar va xizmatlar hajmining talabga mos ravishda oshirilishi bo‘yicha choralarning o‘z vaqtida ko‘rilishi va alohida tovar bozorlarida raqobatning kuchaytirilishi muhim ahamiyatga ega”, — deyilgan sharhda.
2020-yilning aprelida, mamlakatdagi karantin cheklovlari vaqtida hukumat narxlar oshib ketishi borasidagi ogohlantirishlarga qaramay, sement importini cheklagan edi. Natijada sement mahsulotlari o‘rtacha 25 foizga qimmatlashgan. Taqiq oradan bir oy o‘tgach yechilgan edi.
Iyul oyida sement olib kirish jarayonini soddalashtirib, uni erkin muomalaga oldingidek 28 kun ichida emas, balki 1-2 kun davomida kiritishga ruxsat bergan. Bu ayrim narxlarning barqarorlashishiga sabab bo‘lgan.
Mart boshida uy-joy qurilishi va ipoteka bozorini rivojlantirishga bag‘ishlangan yig‘ilishda bosh vazirning birinchi o‘rinbosari Ochilboy Ramatov Prezidentdan korxonalarga sement va metallni ishlab chiqaruvchilardan to‘g‘ridan to‘g‘ri sotib olishga ruxsat so‘ragan. U o‘z taklifini 2021-yilda qurilish ishlari hajmi ikki barobarga oshishi, qurilish materiallariga bo‘lgan talab esa narxning oshishiga olib kelishi bilan asoslagan. Shavkat Mirziyoyev taklifni yaxshilab o‘rganib chiqish va shaffof tizim yaratish zarurligini ta’kidlagan.
Izoh (0)