2021 йил 1 апрелдан 1 октябргача цемент маҳсулотини (TIF TN коди 2523) Ўзбекистонга олиб киришда божхона божининг ноль ставкаси қўлланилади. Бу ҳақда Президентнинг «Бозор тамойилларига асосланган ипотека кредитларини ажратиш орқали аҳолини уй-жой билан таъминлашга оид қўшимча чора-тадбирлар тўғрисида»ги фармонида белгиланган.
Бундан мақсад — мамлакатда қурилаётган уй-жойлар нархини арзонлаштириш. Ҳозирда бож ставкаси божхона қийматининг 30 фоизини ташкил этмоқда.
11 март куни Марказий банк томонидан эълон қилинган шарҳда яқин ойларда қурилиш соҳасидаги ўсиш ўтган йилгига нисбатан ошиши кутилаётгани қайд этилган. Бу эса цемент ва бошқа қурилиш материаллари нархининг ошишига олиб келади. «Шу муносабат билан ички бозорда товар ва хизматлар ҳажмининг талабга мос равишда оширилиши бўйича чораларнинг ўз вақтида кўрилиши ва алоҳида товар бозорларида рақобатнинг кучайтирилиши муҳим аҳамиятга эга», — дейилган шарҳда.
2020 йилнинг апрелида, мамлакатдаги карантин чекловлари вақтида ҳукумат нархлар ошиб кетиши борасидаги огоҳлантиришларга қарамай, цемент импортини чеклаган эди. Натижада цемент маҳсулотлари ўртача 25 фоизга қимматлашган. Тақиқ орадан бир ой ўтгач ечилган эди.
Июль ойида цемент олиб кириш жараёнини соддалаштириб, уни эркин муомалага олдингидек 28 кун ичида эмас, балки 1-2 кун давомида киритишга рухсат берган. Бу айрим нархларнинг барқарорлашишига сабаб бўлган.
Март бошида уй-жой қурилиши ва ипотека бозорини ривожлантиришга бағишланган йиғилишда бош вазирнинг биринчи ўринбосари Очилбой Раматов Президентдан корхоналарга цемент ва металлни ишлаб чиқарувчилардан тўғридан-тўғри сотиб олишга рухсат сўраган. У ўз таклифини 2021 йилда қурилиш ишлари ҳажми икки баробарга ошиши, қурилиш материалларига бўлган талаб эса нархнинг ошишига олиб келиши билан асослаган. Шавкат Мирзиёев таклифни яхшилаб ўрганиб чиқиш ва шаффоф тизим яратиш зарурлигини таъкидлаган.
Изоҳ (0)