Yangiyo‘lda bino hujjatlarini tayyorlab berishini va’da qilib, tadbirkordan pora olayotgan Kadastr agentligi xodimi ushlandi

Kadastr agentligining Yangiyo‘l tumani bo‘limi boshlig‘i vazifasini bajaruvchisi tadbirkordan pora olayotganda ushlandi, deya xabar bermoqda Bosh prokuratura huzuridagi Departament matbuot xizmati.

Ma’lum qilinishicha, Bosh prokuratura huzuridagi Departament tomonidan tadbirkorlik subyektlarining huquq va manfaatlarini himoya qilish yuzasidan tezkor tadbir o‘tkazilgan.

Tadbirda Kadastr agentligining Toshkent viloyati Yangiyo‘l tuman bo‘limi boshlig‘i vazifasini vaqtincha bajaruvchi S.J. “R.M.” MChJ tomonidan qurilgan “Avtomobillarga gaz to‘ldirish kompressor” shoxobcha binosining kadastr hujjatlarini tayyorlab berishi evaziga, jamiyat rahbaridan 10 tonna sement olib berishni talab qilib, sementni bozor narxida o‘rtacha 10 million so‘mga hisoblab, dastlab Cobalt rusumli avtotransport vositasi uchun akkumulyator hamda 500 AQSh dollarini pora tariqasida olgan vaqtida ashyoviy dalillar bilan ushlangan.

Mazkur holat yuzasidan S.J.ga nisbatan Jinoyat kodeksining 210-moddasi (pora olish) bilan jinoyat ishi qo‘zg‘atilib, tergov harakatlari o‘tkazilmoqda.

Bundan avval Sirdaryoda Davlat soliq boshqarmasi bo‘lim boshlig‘i 1000 dollar pora bilan qo‘lga tushgani, Jizzaxda daraxtlarning kesilganini yashirish uchun pora talab qilgan atrof-muhitni muhofaza qilish xodimi ushlangani hamda Qo‘qon davlat pedagogika institutiga o‘qishga kiritib qo‘yishni va’da qilib, 3 ming dollar olgan dekanga sud hukmi o‘qilgani haqida xabar berilgandi.