Toshkent viloyatining Bekobod tumanida aholini ichimlik suvi bilan ta’minlash uchun ajratilgan mablag‘larni talon-toroj qilgan MChJ rahbarlariga nisbatan jinoyat ishi qo‘zg‘atildi. Bu haqda Bosh prokuratura huzuridagi Iqtisodiy jinoyatlarga qarshi kurash departamenti xabar berdi.
Departamentning Bekobod tuman bo‘limi tomonidan o‘tkazilgan tergovga qadar tekshiruvlarda “S.” va “Ye” MChJ tomonidan “Suvoqova” DUK Toshkent viloyat hududiy boshqarmasi bilan aholini ichimlik suvi bilan ta’minlash yuzasidan tuzilgan pudrat shartnomasiga asosan amalga oshirilgan ishlar bo‘yicha tuzilgan hujjatlarga soxta ma’lumotlar kiritilgani aniqlangan.
Amalda bajarilmagan ishlarni qo‘shib yozish orqali “S.” MChJ tomonidan 489 million so‘m, “Ye” MChJ tomonidan 233 million so‘m budjet mablag‘lari talon-toroj qilingan.
Mazkur holatlar yuzasidan har ikki MChJ rahbarlari va boshqalarga nisbatan Jinoyat kodeksining 167-moddasi (talon-toroj qilish), 228-moddasi (hujjatlarni qalbakilashtirish) va 209-moddasi (mansab soxtakorligi) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Buxoroda ichimlik suvi tarmoqlarini rekonstruksiya qilishda 254 million so‘m budjet mablag‘lari talon-toroj qilingani haqida xabar berilgan edi.
Izoh (0)