Samarqandda Turkiyadan qo‘yilgan taqiqni bekor qilish va Janubiy Koreyaga ishga yuborishni va’da qilib, o‘zbekistonliklarni chuv tushirgan Turkiya fuqarosi qo‘lga olindi. Bu haqda IIV Tergov departamenti xabar berdi.
Ma’lum qilinishicha, 2021-yil 31-yanvar kuni N.R.ning arizasi yuzasidan IIV JQBB va DXX xodimlari hamkorligida tezkor tadbir o‘tkazilgan. Shu kuni soat 14:00 larda Samarqand shahri Registon ko‘chasida joylashgan ko‘p qavatli xonadonlardan birida Turkiya fuqarosi Uchar Juma va uning tanishlari O‘zbekiston fuqarolari 23 yoshli erkak M.P., 36 yoshli ayol D.E. va 25 yoshli ayol Z.N. shartli mijoz sifatida jalb qilingan N.R.ga uni Turkiyadagi Ucar uluslararasi danismanlik international consulting shirkati orqali 4200 dollar evaziga Janubiy Koreyaga ishlash uchun yuborishini ma’lum qilib, dastlabki to‘lov sifatida 2000 dollar olgan vaqtida ushlangan.
Holat yuzasidan Samarqand shahri bo‘yicha IIO FMB huzuridagi tergov bo‘limi tomonidan Jinoyat kodeksining 168-moddasi 2-qismi “b” bandi (bir guruh shaxslar tomonidan oldindan til biriktirib firibgarlik sodir etish) bilan jinoyat ishi qo‘zg‘atilgan.
Olib borilgan tergov harakatlari davomida ijtimoiy tarmoqlarda Uchar Juma va M.P. Ucar uluslararasi danismanlik international consulting shirkati orqali Turkiya tomonidan qo‘yilgan taqiqni bekor qilish, chet el davlatlariga ishga yuborish haqida YouTube, Tik Tok ijtimoiy tarmoqlariga e’lon joylashtirib, Andijon, Samarqand va Toshkent shahrida yashovchi fuqarolardan aldov yo‘li bilan jami 6000 dollar olgani aniqlangan.
Hozirda mazkur jinoyat ishi yuzasidan tergov harakatlari IIV huzuridagi Tergov departamenti tomonidan olib borilmoqda.
Izoh (0)