Nukusdagi “Las-Vegas” restoranida mijozlar musiqachi bo‘lib ishlovchi xodimni mast holda kaltaklagani yuzasidan jinoiy ish qo‘zg‘atildi, deya xabar qilmoqda Tergov departamenti.
Qayd etilishicha, 2021-yilning 9-mart kunidan 10-mart kuniga o‘tar kechasi soat 00:30 larda Nukus shahri “Almazar” MFYda joylashgan “Las-Vegas” nomli restoranda musiqachi bo‘lib ishlovchi 22 yoshli I.Q.ning yoniga mijoz 31 yoshli A.A. mast holatda kelib, qo‘lidagi mikrofonini so‘ragan vaqtida rad javobini olgach sheriklari 34 yoshli G.Q. va 33 yoshli S.A. bilan uni urib, do‘pposlashgan.
Oqibatda I.Q. olgan jarohatlari sabab shifoxonaga murojaat qilgan.
Mazkur holat yuzasidan Nukus shahri bo‘yicha IIO FMB huzuridagi Tergov bo‘limi tomonidan Jinoyat kodeksining 277-moddasi 2-qismi “b” bandi (bir guruh shaxslar tomonidan uyushtirilgan bezorilik) bilan jinoyat ishi qo‘zg‘atilgan.
Hozirda tergov harakatlari olib borilmoqda va tergov jarayonida har bir fuqaroning xatti-harakatlariga qonuniy baho berilishi ma’lum qilingan.
Bundan avval Toshkent shahar IIBB voyaga yetmagan o‘g‘lini IIO xodimlari kaltaklaganini aytgan ayolning videosiga izoh bergani, Samarqanddagi kafe yaqinida janjallashgan shaxslar bir-birlariga da’volari yo‘qligiga qaramay, 3 sutkaga qamalgani hamda Toshkentda tez tibbiy yordam xodimlari kaltaklangani yuzasidan jinoyat ishi qo‘zg‘atilgani haqida xabar berilgandi.
Izoh (0)