Нукусдаги «Лас-Вегас» ресторанида мижозлар мусиқачи бўлиб ишловчи ходимни маст ҳолда калтаклагани юзасидан жиноий иш қўзғатилди, дея хабар қилмоқда Тергов департаменти.
Қайд этилишича, 2021 йилнинг 9 март кунидан 10 март кунига ўтар кечаси соат 00:30 ларда Нукус шаҳри «Алмазар» МФЙда жойлашган «Лас-Вегас» номли ресторанда мусиқачи бўлиб ишловчи 22 ёшли И.Қ.нинг ёнига мижоз 31 ёшли А.А. маст ҳолатда келиб, қўлидаги микрофонини сўраган вақтида рад жавобини олгач шериклари 34 ёшли Г.Қ. ва 33 ёшли С.А. билан уни уриб, дўппослашган.
Оқибатда И.Қ. олган жароҳатлари сабаб шифохонага мурожаат қилган.
Мазкур ҳолат юзасидан Нукус шаҳри бўйича ИИО ФМБ ҳузуридаги Тергов бўлими томонидан Жиноят кодексининг 277-моддаси 2-қисми «б» банди (бир гуруҳ шахслар томонидан уюштирилган безорилик) билан жиноят иши қўзғатилган.
Ҳозирда тергов ҳаракатлари олиб борилмоқда ва тергов жараёнида ҳар бир фуқаронинг хатти-ҳаракатларига қонуний баҳо берилиши маълум қилинган.
Бундан аввал Тошкент шаҳар ИИББ вояга етмаган ўғлини ИИО ходимлари калтаклаганини айтган аёлнинг видеосига изоҳ бергани, Самарқанддаги кафе яқинида жанжаллашган шахслар бир-бирларига даъволари йўқлигига қарамай, 3 суткага қамалгани ҳамда Тошкентда тез тиббий ёрдам ходимлари калтаклангани юзасидан жиноят иши қўзғатилгани ҳақида хабар берилганди.
Изоҳ (0)