Efiopiyaning Sharqiy Vellega provinsiyasi Oromiya hududida qurollangan odamlar Efiopiya pravoslav cherkoviga hujum qildi. Hujum oqibatida 30 ga yaqin odam halok bo‘ldi. Bu haqda mahalliy nashr Addis Standard xabar berdi.
Hodisa 5-mart kuni sodir bo‘lgan. Butxona xodimlari ro‘za boshlanadigan kunni belgilash munosabati bilan xizmatga yig‘ilgandi.
Jangarilar cherkov ruhoniysini o‘ldirib, odamlarni o‘g‘irlab ketgan. Jangarilar changalidan qochib qutulganlar hujumchilarni Oromo ozodlik frontining jangovar qanoti — Oromo Ozodlik armiyasining a’zolari edi, deb da’vo qilmoqda. Tashkilot Efiopiyaning ushbu hududi mustaqilligini qo‘lga kiritishga intilib keladi.
Qurbonlarning jasadlari o‘rmondan topilgan. Ularning 21 nafarini ayollar va yosh bolalar tashkil etadi.
Eslatib o‘tamiz, 26-fevral kuni Nigeriyada jinoyatchilar maktabga hujum uyushtirib, 300 nafardan ortiq o‘quvchi qizni o‘g‘irlab ketgan. Ular qizlar yotoqxonasiga bostirib kirib, maktab hududida, taxminan, uch soat bo‘lgan va qizlarni o‘rmonga olib ketgan. Voqeadan to‘rt kun o‘tib, o‘quvchi qizlarning hammasi qutqarilgan edi.
Shuningdek, avval Nigeriyada jangarilarning BMT bazasini yoqib yuborgani va Somalida yuzlab terrorchilar qamoqxonadan qochib ketgani haqida xabarlar berilgan.
Izoh (0)