O‘zbekiston kasaba uyushmalari federatsiyasi rahbari Fermerlar kengashi raisi o‘rinbosarini Prezidentni aldayotganlikda aybladi

O‘zbekiston kasaba uyushmalari federatsiyasining katta majlislar zalida 9-mart, seshanba kuni ayollar muammolarini tizimli hal etish, ularni qo‘llab-quvvatlash bo‘yicha Respublika komissiyasining navbatdagi kengaytirilgan videoselektor yig‘ilishi o‘tkazildi.

“Daryo” muxbiri Mirolim Isajonovning xabar berishicha, tadbirda komissiya a’zosi, Fermer, dehqon xo‘jaliklari va tomorqa yer egalari kengashi raisi o‘rinbosari Abdushokir Rahimovning kengash tomonidan ayollar muammolarini hal qilish va qo‘llab-quvvatlash bo‘yicha belgilangan vazifalar ijrosi yuzasidan ikki oylik hisoboti eshitildi.

“Xotin-qizlar bandligini ta’minlash bo‘yicha berilgan topshiriqlarga asosan, Kengashimiz “ayollar daftari”ga kiritilgan ijtimoiy himoyaga muhtoj xotin-qizlarning 15 ming 665 nafarining bandligini ta’minlashi kerak edi. Biz shundan 7 ming 571 nafariga o‘z xonadonida bir va ikki sotixli issiqxona qurib berishimiz belgilangan. 7 ming 176 nafariga parranda, asalari, quyon, baliq va bedana boqishni yo‘lga qo‘yish orqali, 918 nafar ayolning bandligi tomorqa xizmat korxonalari va klasterlarni tashkil etish orqali ta’minlanishi kerak edi.

Kengashimiz tomonidan ushbu ishlar uchun 75 milliard so‘m mablag‘ ajratilgan. Lekin joriy yilning yanvar—fevral oylarida rejamiz 1 ming 780 nafar xotin-qizlar bandligini ta’minlash bo‘lsa-da, buning uchun 6 milliard so‘m mablag‘ ajratishimiz kerak edi. Biz 1 ming 836 nafar xotin-qizlarni ish bilan ta’minlab, jamg‘armamizdan 7,3 milliard so‘m mablag‘ ajratdik.

Ammo ayrim viloyatlarimiz o‘sha mablag‘dan to‘g‘ri foydalanmadi. Bu masala bo‘yicha Sirdaryo, Navoiy, Andijon, Surxondaryo, Qashqadaryo viloyatlarining kengash raislari juda qattiq ogohlantirildi. Agar ular mart—aprel oylari rejalarini ham xuddi shunday bajaradigan bo‘lsa, ularning ishda qolish yoki qolmasligi bo‘yicha sizlarga takliflarimizni beramiz”, — dedi kengash raisi o‘rinbosari.

Shuningdek, u bu borada mart—aprel oylarida amalga oshirilishi rejalashtirilgan ishlar to‘g‘risida ham to‘xtalib o‘tdi.

Prezident maslahatchisi Rustam Qosimov tomorqadan foydalanish bo‘yicha Xorazm va Toshkent viloyatlaridagi ko‘plab tumanlarning ko‘rsatkichlari pastligini tanqid qilarkan, “Bu milliardlaringiz meni qiziqtirmaydi, bu sizning ichki ishingiz”, — dedi.

Bundan tashqari, Qosimov mas’ullarga chora ko‘rish, ekin ekish mavsumi o‘tib ketmaguncha rejadagi vazifalarni bajarish, “ayollar daftari”ga kiritilgan ayollar muammolarini hal qilib, ular sonini muntazam o‘rganish, muhtoj xotin-qizlarni o‘z vaqtida ro‘yxatga kiritish kerakligini qayd etdi.

Abdushokir Rahimov kelgusida qattiq ishlashga, kamchiliklarni tuzatishga va’da berdi.

“Siz bizga va’da bermang, bizga masala ko‘taring. Eplolmayapman, ikki oydan beri qo‘limdan kelmadi, deng. Bizdan yordam so‘rang. Masalani ko‘taring. Biz bir tomonlama o‘ylayotganimiz yo‘q. Nega shu paytgacha indamay o‘tiribsiz selektor bo‘lishini poylab? Komissiyaga murojaat qiling. Qayerdadir masala ko‘rdikmi, yig‘ilish o‘tkazmaymiz boshqa. Yig‘ilishni sektorlar, tumanlar bo‘yicha o‘tkazamiz, onlayn ishlaymiz”, — dedi Prezident maslahatchisi.

O‘zbekiston kasaba uyushmalari federatsiyasi raisi Qudratilla Rafiqov Fermer, dehqon xo‘jaliklari va tomorqa yer egalari kengashi raisi o‘rinbosari Abdushokir Rahimovni Prezidentni aldayotganlikda aybladi.

“Menga qarang, turing o‘rningizdan. Tanzila Kamolovna, biz bu odam bilan uch oydan beri ishlayapmiz, masala hal bo‘lmasa kerak. Hayitov kelsin (Fermer, dehqon xo‘jaliklari va tomorqa yer egalari kengashi raisi - tahr.), bu odam masalasini hal qilish kerak.

Hozir Vazirlar Mahkamasiga ham chiqamiz, siz chiqib ketavering bu yerdan, siz ishlamaysiz boshqa. Siz bitta meni emas, Tanzila Kamalovnani emas, Prezidentni aldayapsiz. Sizlarning gapingizga ishonib, Prezidentga kecha ham, o‘tgan kuni ham axborot berdim. Bugun ham administratsiya rahbariga hammamiz hisobot berdik. Nima qilasizlar bizni aldab? Undan ko‘ra, hal bo‘lmayotgan masalalar bo‘yicha yordam so‘ranglar. Uch oydan beri sizga yaxshi gapiryapmiz”, — dedi Qudratilla Rafiqov.

Shundan so‘ng tadbirni yoritish uchun kelgan OAV vakillaridan yig‘ilishni tark etish so‘raldi.