BMTning Bolalar fondi (YuNISEF) qizlarning ta’lim olishi, ma’lumot olish imkoniyatini, salohiyatini oshirish, yosh ayollarga esa ish bilan ta’minlanishda teng imkoniyatlar yaratish hamda ularning huquq va imkoniyatlarini kengaytirishga investitsiya kiritishga chaqirdi. Bu haqda fondning Toshkentdagi vakolatxonasi press-relizida aytilgan, deb yozmoqda “Gazeta.uz”.
Joriy yilgi Xalqaro xotin-qizlar kuniga bag‘ishlangan “Ayollar rahbarlik lavozimlarida: COVID-19 dunyosida teng kelajakka erishish” mavzusi qizlar va ayollarning barcha sohalarda teng ishtirokini ta’minlashda kuchlarni birlashtirishga qaratilgan.
“Biz bugungi kunda rahbarlik lavozimlarida ko‘rayotgan ayollar o‘tmishda ta’lim olish, resurslardan foydalanish va ishga kirish imkoniyatlariga ega bo‘lgan. Keling, bugun shunday imkoniyatni O‘zbekistondagi qizlar va yosh ayollarga taqdim etamiz”, — degan YuNISEFning O‘zbekistondagi vakolatxonasi rahbari Munir Mamedzoda.
Agar o‘rta maktabni tugatgandan so‘ng 19-24 yashar yoshlarning 56 foizi o‘qish, ish yoki kasbiy tayyorgarlik bilan qamrab olinmagan (NEET) bo‘lsa, ayollar uchun NEET (Not in Education, Employment or Training) darajasi 18 yoshga to‘lgandan so‘ng tez o‘sib boradi (1,7 foizdan 69 foizgacha). 25-30 yoshli ayollarda u 74 foizga yetadi, erkaklarda esa u odatda pastligicha qoladi (ko‘pi bilan 33,5 foiz) va yosh o‘tgan sari pasayadi.
Ma’lumotlar, shuningdek, qizlar va yosh ayollarda internet orqali ma’lumot olishda to‘siqlar borligini ko‘rsatmoqda. Hech qachon internetdan foydalanmagan 14-30 yoshdagi yosh ayollar soni shu yoshdagi erkaklarga nisbatan ikki baravar ko‘p — mos ravishda 68,1 foiz va 34,3 foiz.
YuNISEF davlat tashkilotlari, nodavlat notijorat tashkilotlari va hamjamiyatlarni ayollarning oliy ma’lumot olish hamda ishga kirish imkoniyatlaridan teng foydalanishni ta’minlaydigan platformalarni kengaytirishga chaqirgan va quyidagilarni amalga oshirishni tavsiya etgan:
- Yosh ayollarga alohida e’tibor bergan holda hayotiy, texnik, innovatsion va tadbirkorlik ko‘nikmalarga ega bo‘lishlari uchun rasmiy va norasmiy ta’limni kuchaytirish.
- Xotin-qizlarning iqtisodiy, siyosiy va jamoat sohalaridagi faol ishtirokini qo‘llab-quvvatlash.
- Qizlarni yosh turmushga berish va oliy ma’lumot olishga to‘sqinlik qilish singari salbiy ijtimoiy me’yorlarga barham berishga qaratilgan kampaniyalarni o‘tkazish.
Izoh (0)