Ўзбекистон касаба уюшмалари федерацияси раҳбари Фермерлар кенгаши раиси ўринбосарини Президентни алдаётганликда айблади

Ўзбекистон касаба уюшмалари федерациясининг катта мажлислар залида 9 март, сешанба куни аёллар муаммоларини тизимли ҳал этиш, уларни қўллаб-қувватлаш бўйича Республика комиссиясининг навбатдаги кенгайтирилган видеоселектор йиғилиши ўтказилди.

«Дарё» мухбири Миролим Исажоновнинг хабар беришича, тадбирда комиссия аъзоси, Фермер, деҳқон хўжаликлари ва томорқа ер эгалари кенгаши раиси ўринбосари Абдушокир Раҳимовнинг кенгаш томонидан аёллар муаммоларини ҳал қилиш ва қўллаб-қувватлаш бўйича белгиланган вазифалар ижроси юзасидан икки ойлик ҳисоботи эшитилди.

«Хотин-қизлар бандлигини таъминлаш бўйича берилган топшириқларга асосан, Кенгашимиз «аёллар дафтари»га киритилган ижтимоий ҳимояга муҳтож хотин-қизларнинг 15 минг 665 нафарининг бандлигини таъминлаши керак эди. Биз шундан 7 минг 571 нафарига ўз хонадонида бир ва икки сотихли иссиқхона қуриб беришимиз белгиланган. 7 минг 176 нафарига парранда, асалари, қуён, балиқ ва бедана боқишни йўлга қўйиш орқали, 918 нафар аёлнинг бандлиги томорқа хизмат корхоналари ва кластерларни ташкил этиш орқали таъминланиши керак эди.

Кенгашимиз томонидан ушбу ишлар учун 75 миллиард сўм маблағ ажратилган. Лекин жорий йилнинг январь—февраль ойларида режамиз 1 минг 780 нафар хотин-қизлар бандлигини таъминлаш бўлса-да, бунинг учун 6 миллиард сўм маблағ ажратишимиз керак эди. Биз 1 минг 836 нафар хотин-қизларни иш билан таъминлаб, жамғармамиздан 7,3 миллиард сўм маблағ ажратдик.

Аммо айрим вилоятларимиз ўша маблағдан тўғри фойдаланмади. Бу масала бўйича Сирдарё, Навоий, Андижон, Сурхондарё, Қашқадарё вилоятларининг кенгаш раислари жуда қаттиқ огоҳлантирилди. Агар улар март—апрель ойлари режаларини ҳам худди шундай бажарадиган бўлса, уларнинг ишда қолиш ёки қолмаслиги бўйича сизларга таклифларимизни берамиз», — деди кенгаш раиси ўринбосари.

Шунингдек, у бу борада март—апрель ойларида амалга оширилиши режалаштирилган ишлар тўғрисида ҳам тўхталиб ўтди.

Президент маслаҳатчиси Рустам Қосимов томорқадан фойдаланиш бўйича Хоразм ва Тошкент вилоятларидаги кўплаб туманларнинг кўрсаткичлари пастлигини танқид қиларкан, «Бу миллиардларингиз мени қизиқтирмайди, бу сизнинг ички ишингиз», — деди.

Бундан ташқари, Қосимов масъулларга чора кўриш, экин экиш мавсуми ўтиб кетмагунча режадаги вазифаларни бажариш, «аёллар дафтари»га киритилган аёллар муаммоларини ҳал қилиб, улар сонини мунтазам ўрганиш, муҳтож хотин-қизларни ўз вақтида рўйхатга киритиш кераклигини қайд этди.

Абдушокир Раҳимов келгусида қаттиқ ишлашга, камчиликларни тузатишга ваъда берди.

«Сиз бизга ваъда берманг, бизга масала кўтаринг. Эплолмаяпман, икки ойдан бери қўлимдан келмади, денг. Биздан ёрдам сўранг. Масалани кўтаринг. Биз бир томонлама ўйлаётганимиз йўқ. Нега шу пайтгача индамай ўтирибсиз селектор бўлишини пойлаб? Комиссияга мурожаат қилинг. Қаердадир масала кўрдикми, йиғилиш ўтказмаймиз бошқа. Йиғилишни секторлар, туманлар бўйича ўтказамиз, онлайн ишлаймиз», — деди Президент маслаҳатчиси.

Ўзбекистон касаба уюшмалари федерацияси раиси Қудратилла Рафиқов Фермер, деҳқон хўжаликлари ва томорқа ер эгалари кенгаши раиси ўринбосари Абдушокир Раҳимовни Президентни алдаётганликда айблади.

«Менга қаранг, туринг ўрнингиздан. Танзила Камоловна, биз бу одам билан уч ойдан бери ишлаяпмиз, масала ҳал бўлмаса керак. Ҳайитов келсин (Фермер, деҳқон хўжаликлари ва томорқа ер эгалари кенгаши раиси - таҳр.), бу одам масаласини ҳал қилиш керак.

Ҳозир Вазирлар Маҳкамасига ҳам чиқамиз, сиз чиқиб кетаверинг бу ердан, сиз ишламайсиз бошқа. Сиз битта мени эмас, Танзила Камаловнани эмас, Президентни алдаяпсиз. Сизларнинг гапингизга ишониб, Президентга кеча ҳам, ўтган куни ҳам ахборот бердим. Бугун ҳам администрация раҳбарига ҳаммамиз ҳисобот бердик. Нима қиласизлар бизни алдаб? Ундан кўра, ҳал бўлмаётган масалалар бўйича ёрдам сўранглар. Уч ойдан бери сизга яхши гапиряпмиз», — деди Қудратилла Рафиқов.

Шундан сўнг тадбирни ёритиш учун келган ОАВ вакилларидан йиғилишни тарк этиш сўралди.