Buxoroda tadbirkorga o‘qotar qurol o‘qtalib, undan 70 ming dollar talab qilgan sportchilardan iborat jinoiy guruh qo‘lga olindi. Bu haqda “Daryo”ga viloyat IIB axborot xizmati rahbari Shuhrat Jalolov xabar berdi.
Ta’kidlanishicha, sportchilardan iborat bir necha kishi viloyatda o‘ziga to‘q tadbirkor sifatida tanilgan 46 yoshli T.S.ning katta daromadga ega ekanini va moddiy jihatdan yaxshi ta’minlanganidan xabardor bo‘lgach, tovlamachilik yo‘li bilan undan pul undirish payiga tushgan.
Aniqlanishicha, 1962-yilda tug‘ilgan fuqaro B.S. 1960-yilda tug‘ilgan akasi B.I., 1992-yilda tug‘ilgan I.S. hamda 1983-yilda tug‘ilgan Sh.D. ismli sportchi yigitlar bilan jinoiy til biriktirib, tadbirkordan pul undirish rejasini tuzgan va vazifalarni o‘zaro taqsimlab olgan.
Voqealar rivojiga ko‘ra, T.S.ning ishxonasiga qo‘shni qurilish firmasida qorovul bo‘lib ishlab kelayotgan B.I. sheriklariga kunlik ma’lumotlarni yetkazib turgan. Guruh tadbirkorning qaysi vaqtda ishga kelishi va ishdan ketishi, qaysi rusumdagi avtomashinalarda yurishi, yonida kimlar bo‘lishi va boshqa shu kabi ma’lumotlarga ega bo‘lgach, uni qo‘rqitish maqsadida “TOZ” rusumli qirqma o‘qotar qurol ham tayyorlab qo‘ygan.
2021-yilning 4-mart kuni soat 17:10 da gumonlanuvchi B.S. akasi I.S. bilan Sh.D.ning mashinasida tadbirkor boshqaruvida bo‘lgan Captiva’ni yo‘lda to‘xtatib, mashina saloniga o‘tirgan. Va oldindan tayyorlab qo‘yilgan o‘qotar qurolni tadbirkorga o‘qtalib, uni o‘ldirish uchun buyurtma tushganini, agar uni bajarsa, 50 ming dollar xizmat haqi olishini, agarda buyurtmachi tomonidan beriladigan summadan ortiqroq pul bersa, uni o‘ldirmasdan, buyurtma bergan shaxslar to‘g‘risida ma’lumot berishini aytib, 70 ming dollar talab qilgan.
Tadbirkor bu shaxslarning talabiga rozi bo‘lib, ikki kun muhlat so‘ragan va shu tariqa ularning qo‘lidan qutulgan.
2021-yilning 5-mart kuni viloyat IIB boshlig‘iga murojaat qilgan tadbirkor o‘z arizasida unga nisbatan tovlamachilik qilayotgan shaxslar haqida ma’lum qilgan va ko‘mak so‘ragan.
Tadbirkor arizasiga ko‘ra, viloyat IIB Jinoyat qidiruv boshqarmasi tomonidan tergov-tezkor guruhi tuzilib, kechiktirib bo‘lmas tergovga qadar tekshiruv harakatlari olib borilgan.
2021-yilning 6-mart kunidan 7-mart kuniga o‘tar kechasi o‘tkazilgan tezkor tadbirda jinoiy guruh a’zosi I.S. kimyoviy ishlov berilgan qiymati 522 million so‘m bo‘lgan 50 ming dollarni jabrlanuvchidan olayotgan vaqtda ashyoviy dalillar bilan qo‘lga olingan.
Jinoiy guruh tashkilotchisi B.S. dan esa bir dona “TOZ” rusumli qirqma o‘qotar qurol, 6 dona jangovar patronlar, jinoiy guruhning yana bir a’zosi I.S.dan bir dona sovuq qurol hisoblangan pichoq ashyoviy dalil sifatida hujjatlashtirib olingan.
Hozirda mazkur holat yuzasidan viloyat IIB Tergov boshqarmasi tomonidan jinoiy guruh a’zolariga nisbatan Jinoyat kodeksining 165-moddasi 3-qismi bilan (tovlamachilik) jinoyat ishi qo‘zg‘atilgan. Ayni paytda gumonlanuvchilarga nisbatan qamoqqa olish tarzidagi ehtiyot chorasi qo‘llanilgan va dastlabki tergov harakatlari davom ettirilmoqda.
Mavzuga doir:
- Farg‘onada dugonasining suratlarini turmush o‘rtog‘iga ko‘rsatmaslik uchun 1,5 ming dollar talab qilgan qizlar ushlandi
- Farg‘onada erkakning “ishqiy sahnalari”ni tarqatmaslik uchun 2 ming dollar talab qilgan ayol ushlandi
- Samarqandda o‘zini mansabdor ko‘rsatib, aldov yo‘li bilan fuqarodan 4 million so‘m talab qilgan ekologiya xodimi qo‘lga olindi
Izoh (0)