O‘zbekiston kasaba uyushmalari federatsiyasining katta majlislar zalida bugun, 9-mart kuni Ayollar muammolarini tizimli hal etish, ularni qo‘llab-quvvatlash bo‘yicha Respublika komissiyasining navbatdagi kengaytirilgan videoselektor yig‘ilishi o‘tkazildi. Bu haqda tadbirda qatnashgan “Daryo” muxbiri Mirolim Isajonov xabar berdi.
Davlat rahbari raisligida 2021-yilning 26-fevral kuni xotin-qizlarni ijtimoiy qo‘llab-quvvatlash masalasiga bag‘ishlab o‘tkazilgan videoselektor yig‘ilishi hamda 6-mart kuni qabul qilingan “Xotin-qizlarni qo‘llab-quvvatlash, ularning jamiyat hayotidagi faol ishtirokini ta’minlash tizimini yanada takomillashtirish chora-tadbirlari to‘g‘risida”gi O‘zbekiston Prezidenti qarorida belgilangan chora-tadbirlarni amalga oshirishga bag‘ishlangan tadbirda Senat raisi Tanzila Norboyeva, Prezident maslahatchisi Rustam Qosimov hamda Toshkent shahri va viloyatlardagi mansabdor shaxslar, tegishli tashkilot rahbarlari qatnashdi.
Yig‘ilish avvalida nutq so‘zlagan O‘zbekiston kasaba uyushmalari federatsiyasi raisi Qudratilla Rafiqovning ta’kidlashicha, videoselektor yig‘ilishida jami 1 ming 750 nafarga yaqin xodim ishtirok etgan.
“Davlatimiz rahbari ayollarning muammolarini hal etish va ijtimoiy qo‘llab-quvvatlash uchun davlat budjetidan 2,5 trillion so‘m mablag‘ ajratib berdilar. Bunday narsa tarixda bo‘lgan emas. Kechagi qarorda yana qo‘shimcha ravishda 600 milliard so‘m sohaga yo‘naltiriladigan bo‘ldi”, — dedi Rafiqov.
Mahalla va oilani qo‘llab-quvvatlash vaziri o‘rinbosari Gulnora Ma’rufova xotin-qizlar masalalarini hal etish borasida amalga oshirilayotgan ishlar va rejalar xususida so‘z yuritdi. Shundan so‘ng bandlik va mehnat munosabatlari vazirining birinchi o‘rinbosari Erkin Muhiddinov hamda Fermer, dehqon xo‘jaliklari va tomorqa yer egalari kengashi raisi o‘rinbosari Abdushokir Rahimovlarning hisobotlari eshitildi. Ularning ayollar muammolarini hal qilish va qo‘llab-quvvatlash bo‘yicha olib borayotgan ishlari keskin tanqid qilindi.
Tanqidiy-tahliliy ruhda kechayotgan tadbirning ayni qizg‘in pallasida yig‘ilishni yoritish uchun kelgan OAV vakillari kutilmaganda chiqarib yuborildi.
“Farhod aka, ‘televizorchik’lar ketsin, bo‘ldi. Bu yerda gaplarimiz bor-da bizning, iltimos sizlardan, ruxsat hammalaringizga. Farhod aka? Shu yerdami, Farhod aka? Mahmudov bularga (jurnalistlar nazarda tutilmoqda – tahr.) ruxsat beraylik, bo‘ldi ketaversin, bo‘ldi rahmat”, — dedi Rafiqov yig‘ilishda ishtirok etayotgan O‘zbekiston milliy teleradiokompaniyasi raisining birinchi o‘rinbosari Farhod Mahmudovga yuzlanib.
Soat 11:00 da boshlangan yig‘ilishda bir yarim soatdan so‘ng nafaqat “O‘zbekiston 24”, “Yoshlar”, UzReport, “Mening yurtim”, Zo‘r TV kabi telekanal muxbirlari, balki “Daryo.uz”, “Xalq so‘zi online”, “Bugun.uz” singari internet-nashr vakillariga ham chiqib ketishi aytildi.
Jurnalistlar O‘zbekiston kasaba uyushmalari federatsiyasi matbuot xizmati rahbari Muhabbat O‘rmonbekova hamda Oliy Majlis Senati matbuot xizmati vakili Jonibek Ma’rupovlardan mazkur vaziyat bo‘yicha izoh so‘rashdi. Ammo ular bu holatga javob bera olmadi.
Yig‘ilishdan jurnalistlar chiqarib yuborilar ekan, nima uchun tadbirga OAV vakillari taklif etildi?
Biz mazkur vaziyat bo‘yicha rasmiylardan aniq izoh kutib qolamiz.
Izoh (0)