Boyovut tumani hokimi Dilfuza Uralova “Sirdaryo xabarlari” nashriga bergan intervyusi davomida koronavirusdan davolanib chiqqanini ma’lum qildi.
“Pandemiya davrida bu kasallik (koronavirus — tahr.) hech kimni chetlab o‘tmadi. Shaxsan o‘zim ham bu kasallikdan davolanib chiqdim. Tan olib aytishim kerakki, baribir davlatimizning qudratli ekanligi yaqqol ko‘rindi...”, — deydi Dilfuza Uralova.
Boyovut hokimi intervyu davomida qachon ushbu kasallikka chalingani va qayerda davolanib chiqqaniga aniqlik kiritmagan. Shuningdek, Dilfuza Uralova pandemiya davrida tumanning oyoqqa turishida kichik biznesning qanchalik ahamiyat kasb etgani, ushbu sohani qo‘llab-quvvatlash lozimligini ta’kidlab o‘tgan.
Ma’lumot uchun, bugunga qadar Mirishkor tumani hokimi G‘ayrat Begaliyev, Buxoro viloyati hokimi Karim Kamolov, Qoraqalpog‘iston rahbari Musa Yerniyazov, Qonliko‘l tumani hokimi Daulet Tolibayev, Mirishkor tumani hokimi G‘ayrat Begaliyev, Xonobod shahri hokimi Musaxon Mamadaliyev, Oltinko‘l tumani hokimi Nazirjon O‘rinboyev koronavirus infeksiyasi asoratlari oqibatida vafot etgan.
Navoiy viloyati hokimi Qobul Tursunov, Surxondaryo viloyati hokimi To‘ra Bobolov, Nurobod tumani hokimi Faxriddin Zoirov, Andijon viloyatining Paxtaobod va Shahrixon tumanlari hokimlari koronavirusdan sog‘aygan edi.
O‘zbekistonda COVID-19 kasalligiga chalinganlar soni rasman 3-mart kuni 80 ming kishidan oshgan. Sog‘liqni saqlash vazirligidan xabar berishlaricha, 8-mart holatiga ko‘ra, mamlakatda jami 80 219 holatda koronavirus infeksiyasi aniqlangan. Kasallanganlarning 1,62 foizi (1303 kishi) Sirdaryo viloyati hisobiga to‘g‘ri keladi.
Sog‘liqni saqlash vazirligining qo‘shimcha qilishicha, 8-mart holatiga ko‘ra shu vaqtgacha tasdiqlangan bemorlarning 78 915 nafari (99 foizi) sog‘aygan, kasallik asoratlari oqibatida vafot etganlar soni rasman 622 nafarga yetgan — mamlakatda koronavirus asoratlari oqibatida hozircha oxirgi o‘lim holati 10-fevral kuni qayd etilgan (ma’lumot uchun, SSV statistikasidagi kamida bitta o‘lim holati O‘zbekistonda yuz bermagan; “Daryo” 2020-yil 22-sentabrga qadar yuritgan alohida statistikaga ko‘ra, qurbonlar soni kamida 19 nafarga ko‘p).
Kasallanganlar soni rasmiy statistikadan bir necha barobar ko‘p bo‘lishi mumkin
O‘zbekiston hukumati koronavirus statistikasiga doir raqamlarni yashirish yoki ularni buzib ko‘rsatishdan manfaatdor emasligini muntazam ta’kidlab keladi, aslida kasallanganlar soni rasmiy statistikadagidan ikki-uch barobarga ko‘p bo‘lishi mumkinligini aynan shu hukumat tuzilmalariga aloqador mas’ullar ham, shu hukumat qoshida tuzilgan Respublika maxsus komissiyasi ham tan olgan, ta’kidlagan.Iyul oyida karantin tartibi qayta kuchaytirilishi arafasida, 8-iyul kuni tashkil etilgan matbuot anjumanida Sog‘liqni saqlash vazirligi huzuridagi Koronavirusga qarshi kurashish bo‘yicha shtab a’zosi Habibulla Oqilov COVID-19’ni yuqtirib olganlar soni rasmiy statistikadagidan ikki-uch barobarga ko‘p bo‘lishi mumkinligini aytib o‘tgan edi.
9-iyul kuni esa Respublika maxsus komissiyasi O‘zbekistonda kuchaytirilgan karantin tartibi qayta tiklanishi sabablarini izohlarkan, “rasmiy statistika faqat aniqlangan kasallanish holatlarini qayd etayotgani, haqiqiy holat, boshqa mamlakatlardagi kabi, bir necha barobar farqli bo‘lishi mumkin”ligini tan olgan edi.
Toshkent tibbiyot akademiyasi prorektori, SSV huzuridagi koronavirusga qarshi kurashish shtabi a’zosi Shuhrat Boymurodov 20-sentabr kuni “O‘zbekiston 24” telekanalining “Studiya 24” dasturidagi chiqishida rasmiy statistikaga faqat rasman murojaat qilib yoki davolash muassasalarida test topshirgan va testining natijasi musbat chiqqan fuqarolargina kiritilganini aytib o‘tgandi.
28-avgust kuni o‘tkazilgan yig‘ilishda O‘zbekiston Prezidenti Shavkat Mirziyoyev haqiqiy holat bo‘yicha raqamlarni yashirishga mutlaqo yo‘l qo‘ymaslik to‘g‘risida barcha rahbarlarni ogohlantirgandi. Bunga urinish jinoiy javobgarlikkacha bo‘lgan qat’iy choralarga olib kelishi mumkinligi ta’kidlangandi. Shuningdek “Yuksalish” umummilliy harakati koronavirus bo‘yicha haqiqiy statistikani yashirmaslikka chaqirgan.
Izoh (0)