Боёвут тумани ҳокими Дилфуза Уралова коронавирусга чалиниб, соғайганини маълум қилди

Боёвут тумани ҳокими Дилфуза Уралова «Сирдарё хабарлари» нашрига берган интервьюси давомида коронавирусдан даволаниб чиққанини маълум қилди.

«Пандемия даврида бу касаллик (коронавирус — таҳр.) ҳеч кимни четлаб ўтмади. Шахсан ўзим ҳам бу касалликдан даволаниб чиқдим. Тан олиб айтишим керакки, барибир давлатимизнинг қудратли эканлиги яққол кўринди...», — дейди Дилфуза Уралова.

Боёвут ҳокими интервью давомида қачон ушбу касалликка чалингани ва қаерда даволаниб чиққанига аниқлик киритмаган. Шунингдек, Дилфуза Уралова пандемия даврида туманнинг оёққа туришида кичик бизнеснинг қанчалик аҳамият касб этгани, ушбу соҳани қўллаб-қувватлаш лозимлигини таъкидлаб ўтган.

Маълумот учун, бугунга қадар Миришкор тумани ҳокими Ғайрат Бегалиев, Бухоро вилояти ҳокими Карим Камолов, Қорақалпоғистон раҳбари Муса Ерниязов, Қонликўл тумани ҳокими Даулет Толибаев, Миришкор тумани ҳокими Ғайрат Бегалиев, Хонобод шаҳри ҳокими Мусахон Мамадалиев, Олтинкўл тумани ҳокими Назиржон Ўринбоев коронавирус инфекцияси асоратлари оқибатида вафот этган.

Навоий вилояти ҳокими Қобул Турсунов, Сурхондарё вилояти ҳокими Тўра Боболов, Нуробод тумани ҳокими Фахриддин Зоиров, Андижон вилоятининг Пахтаобод ва Шаҳрихон туманлари ҳокимлари коронавирусдан соғайган эди.

Ўзбекистонда COVID-19 касаллигига чалинганлар сони расман 3 март куни 80 минг кишидан ошган. Соғлиқни сақлаш вазирлигидан хабар беришларича, 8 март ҳолатига кўра, мамлакатда жами 80 219 ҳолатда коронавирус инфекцияси аниқланган. Касалланганларнинг 1,62 фоизи (1303 киши) Сирдарё вилояти ҳисобига тўғри келади.

Соғлиқни сақлаш вазирлигининг қўшимча қилишича, 8 март ҳолатига кўра шу вақтгача тасдиқланган беморларнинг 78 915 нафари (99 фоизи) соғайган, касаллик асоратлари оқибатида вафот этганлар сони расман 622 нафарга етган — мамлакатда коронавирус асоратлари оқибатида ҳозирча охирги ўлим ҳолати 10 февраль куни қайд этилган (маълумот учун, ССВ статистикасидаги камида битта ўлим ҳолати Ўзбекистонда юз бермаган; «Дарё» 2020 йил 22 сентябрга қадар юритган алоҳида статистикага кўра, қурбонлар сони камида 19 нафарга кўп).

Касалланганлар сони расмий статистикадан бир неча баробар кўп бўлиши мумкин

Июль ойида карантин тартиби қайта кучайтирилиши арафасида, 8 июль куни ташкил этилган матбуот анжуманида Соғлиқни сақлаш вазирлиги ҳузуридаги Коронавирусга қарши курашиш бўйича штаб аъзоси Ҳабибулла Оқилов COVID-19’ни юқтириб олганлар сони расмий статистикадагидан икки-уч баробарга кўп бўлиши мумкинлигини айтиб ўтган эди.

9 июль куни эса Республика махсус комиссияси Ўзбекистонда кучайтирилган карантин тартиби қайта тикланиши сабабларини изоҳларкан, «расмий статистика фақат аниқланган касалланиш ҳолатларини қайд этаётгани, ҳақиқий ҳолат, бошқа мамлакатлардаги каби, бир неча баробар фарқли бўлиши мумкин»лигини тан олган эди.

Тошкент тиббиёт академияси проректори, ССВ ҳузуридаги коронавирусга қарши курашиш штаби аъзоси Шуҳрат Боймуродов 20 сентябрь куни «Ўзбекистон 24» телеканалининг «Студия 24» дастуридаги чиқишида расмий статистикага фақат расман мурожаат қилиб ёки даволаш муассасаларида тест топширган ва тестининг натижаси мусбат чиққан фуқароларгина киритилганини айтиб ўтганди.

28 август куни ўтказилган йиғилишда Ўзбекистон Президенти Шавкат Мирзиёев ҳақиқий ҳолат бўйича рақамларни яширишга мутлақо йўл қўймаслик тўғрисида барча раҳбарларни огоҳлантирганди. Бунга уриниш жиноий жавобгарликкача бўлган қатъий чораларга олиб келиши мумкинлиги таъкидланганди. Шунингдек «Юксалиш» умуммиллий ҳаракати коронавирус бўйича ҳақиқий статистикани яширмасликка чақирган.