Samarqand viloyati Kattaqo‘rg‘on tumanida joylashgan restoranlarning birida sodir bo‘lgan yong‘in qisqa vaqt ichida bartaraf etildi, deb xabar beradi FVV matbuot xizmati.
Ma’lumotlarga ko‘ra, 7-mart kuni soat 11:00 larda tumandagi “Omonboy” mahallasida joylashgan restoranda yong‘in chiqqan.
Ta’kidlanishicha, FVV viloyat boshqarmasining yong‘in-qutqaruv guruhi voqea joyiga yetib kelgan.
“Birlamchi ma’lumotlarga ko‘ra, hodisa oqibatida binoning taxminan 200 metr kvadrat maydoni yong‘indan zararlangan. Qutqaruvchilarning tezkor harakatlari natijasida yong‘in qisqa vaqt ichida to‘liq bartaraf etildi”, — deyiladi xabarda.
Sodir bo‘lgan ko‘ngilsiz hodisa oqibatida jabrlangan va qurbonlar yo‘q.
Avvalroq Toshkentdagi kafe yoqib yuborilishi oqibatida besh kishi — ikki nafari erkak, uch nafar ayol halok bo‘lgani, qasddan yoqib yuborgan shaxs ushlangani haqida xabar berilgandi. Holat yuzasidan jinoyat ishi qo‘zg‘atilib, tergov harakatlari olib borilmoqda.
Shuningdek, Marg‘ilondagi Mustaqillik ko‘chasida joylashgan to‘rtta do‘konda, Jizzaxdagi plastmassa quvurlar ishlab chiqaruvchi korxonada, Nukusda eshik ishlab chiqarish sexida yong‘in yuz bergani haqida xabar berilgandi.
Izoh (0)